លោកឧត្តមសេនីយ៍ទោ ខូវ លី ស្នងការនគរបាលខេត្ត បានអញ្ជើញជួបសំណេះសំណាល សួរសុខទុក្ខ ដល់កម្លាំង នៃវរសេនាតូចនគរបាលការពារព្រំដែនគោកលេខ៩០៥
ខេត្តឧត្ដរមានជ័យ៖ នៅថ្ងៃសុក្រ ១កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០៧ ខែមិថុនា ឆ្នាំ២០២៤ វេលាម៉ោង ០៨និង០០នាទី លោកឧត្តមសេនីយ៍ទោ ខូវ លី ស្នងការ នៃស្នងការដ្ឋាននគរបាលខេត្ត បានអញ្ជើញជួបសំណេះសំណាល សួរសុខទុក្ខ ដល់កម្លាំង នៃវរសេនាតូចនគរបាលការពារព្រំដែនគោកលេខ៩០៥ ដោយមានការចូលរួមពីលោកឧត្តមសេនីយ៍ទោ ស៊ា ហ៊ត អនុប្រធាននាយកដ្ឋាននគរបាលការពារព្រំដែនគោក លោកស្នងការរង លោកនាយការិយាល័យ លោកមេបញ្ជាការ លោកមេបញ្ជាការរង នាយ-នាយរងផ្នែក នាយប៉ុស្តិ៍ការពារទាំង៥ និងមន្រ្តីចំណុះវរសេនាតូចនគរបាលការពារព្រំដែនគោកលេខ ៩០៥ សរុបរួមចំនួន ១០០នាក់ ស្រី ចំនួន ០៦ នាក់ ។
ក្នុងនោះផងដែរ លោកស្នងការ ក៏បាននាំយកនូវ ម៉ូតូចំនួន ០១គ្រឿង គ្រឿងឧបភោគបរិភោគមួយចំនួនរួមមាន៖ អង្ករ ២០ការ៉ុង ប្រេងឆា ៣កេស ត្រីខ ២កេស ទឹកត្រី ៤០យួរ ស្ករស ២ការ៉ុង ប៊ីចេង ២ការ៉ុង និងថវិកាចំនួន ៩,០០០,០០០រៀល ដែលជាថវិកាដ៏ថ្លៃថ្លា របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ឧបត្ថម្ភដល់កងម្លាំង ក្នុងនោះ វរសេនាតូចការពារព្រំដែនគោកលេខ៩០៥ ទទួលបានថវិកាចំនួន ៤,០០០,០០០រៀល និងប៉ុស្តិ៍នគរបាលការពារព្រំដែនគោក ចំនួន ៥ប៉ុស្តិ៍ ដោយក្នុងមួយប៉ុស្តិ៍ទទួលបានថវិកាចំនួន ១,០០០,០០០រៀល។