លោក ចូ បៃដិន ធ្វើទស្សនកិច្ចទៅកាន់អ៊ីស្រាអែលនៅថ្ងៃពុធនេះដើម្បីបង្ហាញពីសាមគ្គីភាពដល់សម្ព័ន្ធមិត្តមួយនេះ
(តែល អាវីវ)៖ យោងតាមការចេញផ្សាយដោយទីភ្នាក់ងារសារព័ត៌មាន AFP កាលពីថ្ងៃអង្គារ ទី១៧ តុលា ឆ្នាំ២០២៣ ដោយដកស្រង់សម្តីរដ្ឋមន្ត្រីការបរទេសអាមេរិកបានឲ្យដឹងថា នៅថ្ងៃពុធសប្ដាហ៍នេះ ប្រធានាធិបតីអាមេរិក លោក ចូ បៃដិន នឹងធ្វើដំណើរទស្សនកិច្ចទៅកាន់ប្រទេសអ៊ីស្រាអែលដែលជាសម្ព័ន្ធមិត្ត ដើម្បីបង្ហាញសាមគ្គីភាពក្នុងសង្រ្គាមអ៊ីស្រាអែល និងក្រុមហាម៉ាស ក៏ដូចជាស្វែងរកការសហការពីអ៊ីស្រាអែលលើជំនួយស៊ីវិលសម្រាប់តំបន់ ហ្គាហ្សា (Gaza) ផងដែរ។
រដ្ឋមន្ត្រីការបរទេសអាមេរិក លោក អេនតូនី ប្លីងខិន (Antony Blinken) បានធ្វើការកត់សម្គាល់បែបនេះ បន្ទាប់ពីជំនួបរយៈពេលជិត ៨ម៉ោងជាមួយ នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ (Benjamin Netanyahu) នាឱកាសបំពេញទស្សនកិច្ចនៅអ៊ីស្រាអែល ជាលើកទី២របស់លោក ចាប់តាំងពីសង្រ្គាមបានផ្ទុះឡើងកាលពីថ្ងៃទី៧ ខែតុលាមក។
តាមការបញ្ជាក់របស់លោក ប្លីងខិន (Blinken) កាលពីថ្ងៃអង្គារម្សិលមិញ ដំណើរទស្សនកិច្ចនៅអ៊ីស្រាអែល ប្រធានាធិបតីអាមេរិក ចូ បៃដិន នឹងអះអាងឡើងវិញពីសាមគ្គីភាពរបស់ សហរដ្ឋអាមេរិក ជាមួយអ៊ីស្រាអែល រួមទាំងការប្ដេជ្ញាចិត្តរឹងដូចដែកថែបចំពោះសន្តិសុខរបស់អ៊ីស្រាអែល។
ក្រៅពីនេះ ប្រមុខការទូតអាមេរិករូបនេះក៏បានសង្កត់ធ្ងន់ដែរថា អ៊ីស្រាអែលមានសិទ្ធិ និងភាពចាំបាច់ដើម្បីការពារប្រជាជនរបស់ខ្លួនពីក្រុមហាម៉ាស និងភេរវករដទៃទៀត និងដើម្បីបង្ការកុំឱ្យមានការវាយប្រហារជាថ្មីនៅពេលអនាគត។
លោក ប្លីងខិន (Blinken) បានបញ្ជាក់បន្ថែមទៀតថា «លោក បៃដិន នឹងស្ដាប់អ្វីដែលអ៊ីស្រាអែលត្រូវការដើម្បីការពារប្រជាជនរបស់ខ្លួន ខណៈយើងកំពុងបន្តធ្វើកិច្ចការជាមួយសភាសំដៅបំពេញតម្រូវការទាំងនោះ»។
ជុំវិញដំណើរទស្សនកិច្ចខាងលើនេះ អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក John Kirby ក៏បានឱ្យដឹងផងដែរថា បន្ទាប់ពីទស្សនកិច្ចទៅកាន់ទីក្រុង តែល អាវីវ (Tel Aviv) ប្រទេសអ៊ីស្រាអែល លោក បៃដិន ក៏គ្រោងបន្តធ្វើដំណើរទស្សនកិច្ចទៅកាន់ប្រទេសហ្ស៊កដានី និងប្រទេសអេហ្ស៊ីបដែរ។
ទស្សនកិច្ចរបស់លោក ចូ បៃដិន ទៅកាន់មជ្ឈឹមបូព៌ានៅពេលនេះ ក៏អាចរួមមានផងដែរនូវការស្វែងរកការសម្របសម្រួលដើម្បីបន្ធូរបន្ថយស្ថានការណ៍ កុំក្លាយសង្រ្គាមរាលដាលក្លាយជាសង្រ្គាមតំបន់ ក្រោយអ៊ីស្រាអែលប្រកាសបោសសម្អាតក្រុមហាម៉ាសឲ្យអស់ពីផែនដី ហើយប្រទេសក្នុងតំបន់ក៏ដូចជាមហាអំណាចមួយចំនួនដែលគាំទ្រក្រុមហាម៉ាសបានចេញសារព្រមានពីការប្រកាសរបស់អ៊ីស្រាអែលខាងលើនេះ៕