កិច្ចប្រជុំដោះស្រាយករណីបណ្តឹងរបស់ប្រជាពលរដ្ឋឈ្មោះ ខេង ស៊្រាន់ ប្តឹងជំទាស់មិនឱ្យចេញវិញ្ញាបនបត្រសម្គាល់ម្ចាស់អចលនវត្ថុនៃក្បាលដីលេខ៤០៥, ៤០៦, ៤០៧ និងលេខ ៤០៨ មានទីតាំងស្ថិតនៅភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង
ខេត្តកោះកុង៖ ថ្ងៃពុធ ១២ រោច ខែភទ្របទ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១១ ខែតុលាឆ្នាំ២០២៣ លោក សុខ សុទ្ធី អភិបាលរង នៃគណៈអភិបាលខេត្តកោះកុង និងជាប្រធានគណៈកម្មការរដ្ឋបាល នៃការចុះបញ្ជីដីមានលក្ខណៈជាប្រព័ន្ធក្នុងភូមិសាស្ត្រខេត្តកោះកុង បានអញ្ជើញដឹកនាំកិច្ចប្រជុំដោះស្រាយករណីបណ្តឹងរបស់ប្រជាពលរដ្ឋឈ្មោះ ខេង ស៊្រាន់ ប្តឹងជំទាស់មិនឱ្យចេញវិញ្ញាបនបត្រសម្គាល់ម្ចាស់អចលនវត្ថុនៃក្បាលដីលេខ៤០៥, ៤០៦, ៤០៧ និងលេខ ៤០៨ មានទីតាំងស្ថិតនៅភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង។
បន្ទាប់ពីកិច្ចប្រជុំពិភាក្សា ការឆ្លើយបំភ្លឺរបស់សាក្សី និងការពិនិត្យឯកសារពាក់ព័ន្ធ ឃើញថា ៖
១ .ឈ្មោះ ខេង ស្រ៊ាន់ ដាក់ពាក្យបណ្តឹងជំទាស់មិនឱ្យចេញប័ណ្ណកម្មសិទ្ធដោយអះអាងថា៖ ដីនេះជារបស់គាត់ និងដីនេះ ឈ្មោះខេង ស្រ៊ាន់ និងឈ្មោះ លាង លន់ មិនបានលក់ទៅឱ្យអ្នកណាទេ ហើយឈ្មោះលាង លន់ ក៏បានបដិសេធថាមិនបានលក់ដីនេះដែរ ព្រមទាំងបានបដិសេធថា ស្នាមមេដៃនៅលើលិខិតទិញលក់ មិនមែនជាស្នាមមេដៃគាត់ទេ
២. ប៉ុន្តែ តាមការពិនិត្យឯកសារទិញលក់ និងពិនិត្យផ្ទៀងផ្ទាត់ស្នាមមេដៃលើលិខិតទិញលក់ ឃើញថា ៖ស្នាមមេដៃ អ្នកលក់ដី ពិតជាស្នាមមេដៃរបស់ឈ្មោះ លាង លន់ ប្រាកដមែន ។
តាមរយៈលទ្ធផល នៃកិច្ចប្រជុំនេះ
លោក សុខ សុទ្ធី ក្នុងនាមជាប្រធានគណៈកម្មការរដ្ឋបាល បានសម្រេចបដិសេធបណ្តឹងរបស់ឈ្មោះ ខេងស្រ៊ាន់ ព្រោះដីនេះបានលក់ទៅឱ្យអ្នកផ្សេងហើយ និងឈ្មោះ ខេង ស្រ៊ាន់ មិនមែនជាម្ចាស់កម្មសិទ្ធិទីតាំងដីនេះទេ។
