រដ្ឋមន្ត្រីក្រសួងសុខាភិបាល ជួបសំណេះសំណាលជាមួយ មន្ត្រីសុខាភិបាល មន្ទីរសុខាភិបាលនៃរដ្ឋបាលខេត្តបន្ទាយមានជ័យ
បន្ទាយមានជ័យ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល រួមនឹងប្រតិភូអមដំណេីរ បានអញ្ជេីញជួបសំណេះសំណាលជាមួយថ្នាក់ដឹកនាំ និងមន្ត្រីសុខាភិបាល មន្ទីរសុខាភិបាលនៃរដ្ឋបាលខេត្តបន្ទាយមានជ័យ ដោយមានការអញ្ជេីញចូលរួម ពីថ្នាក់ដឹកនាំខេត្តបន្ទាយមានជ័យ ថ្នាក់ដឹកនាំ មន្ទីរសុខាភិបាលនៃរដ្ឋបាលខេត្ត ការិយាល័យសុខាភិស្រុកប្រតិបត្តិ មន្ទីរពេទ្យខេត្ត មន្ទីរពេទ្យបង្អែកក្រុង-ស្រុក ប្រធានមណ្ឌលសុខភាព និងមន្ត្រីសុខាភិបាល សរុបជាង២០០នាក់ ប្រារព្ធធ្វេីឡេីងនៅសាលប្រជុំ ធំ សាលាខេត្តបន្ទាយមានជ័យ នារសៀលថ្ងៃអាទិត្យ ១១ កើត ខែស្រាពណ៍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៧ ខែសីហា ឆ្នាំ២០២៣។
មានមតិស្វាគមន៍ ឯកឧត្តម អ៊ុំ រាត្រី ក៏បានសម្តែងនូវកិច្ចស្វាគមន៍យ៉ាងកក់ក្តៅចំពោះដំណើរ ទស្សនកិច្ចដ៏ថ្លៃថ្លា របស់ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងគណៈប្រតិភូអមដំណើរ ដែលបានឆ្លៀតពេលដ៏មមាញឹក អញ្ជើញបំពេញបេសកកម្មនិងជួបសំណេះសំណាលជាមួយថ្នាក់ដឹកនាំ មន្ត្រីរាជការមន្ទីរសុខាភិបាលនៃរដ្ឋបាលខេត្តនាឱកាសនេះ។ ពិសេសឯកឧត្តម ក៏បានថ្លែងអំណរគុណចំពោះក្រុមគ្រូពេទ្យដែលកន្លងមកបានចូលរួមយ៉ាងសកម្ម ក្នុងតំណាក់កាលនៃការឆ្លងរាលដាលជំងឺកូវីដ-១៩នាពេលកន្លងមក។
ដេីម្បីពង្រឹងវិស័យសុខាភិបាលឱ្យកាន់តែមានប្រសិទ្ធភាព ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល បានដាក់ចេញ ៩ចំនុច ដល់មន្ត្រីសុខាភិបាលអនុវត្ត ៖ ១-បង្កេីនការផ្សព្វផ្សាយ ជូនដល់ពលរដ្ឋបានយល់ដឹងពីហានីភ័យជំងឺផ្សេងៗ ស្តីពីបញ្ហាសុខភាព ដែលសុខភាព គឺជាគោលដៅសំខាន់ដែលពលរដ្ឋចង់បាន ជាទ្រព្យដ៏មានតម្លៃរបស់យេីងទាំងអស់គ្នា, ២-ប្រយុទ្ធប្រឆាំងជំងឺឆ្លងផ្សេងៗ, ៣-ទប់ស្កាត់ការឆ្លងរាលដាលជំងឺឆ្លងកាចសាហាវ សកល, ៤-ការប្រយុទ្ធប្រឆាំងមិនឆ្លង (មហារីក សរសៃឈាម ជំងឺបេះដូង…..), ៥-ប្រយុទ្ធផលប៉ះពាល់សុខភាព ការប្រែប្រួលអាកាសធាតុ ផលិតផលអាហារ ប៉ះពាល់សុខភាពផ្សេងៗ (ផលប៉ះពាល់ការប្រេីប្រាស់ឱសថ ប៉ះពាល់សុខភាព ដែលគ្មានការត្រួតពិនិត្យត្រឹមត្រូវពីក្រសួងសុខភិបាល), ៦-ធ្វេីឱ្យកាន់តែប្រសេីឡេីង ការផ្តល់សេវាជូនពលរដ្ឋឱ្យបានល្អនៅតាមសហគមន៍, ៧-លេីកកម្ពស់គុណភាពសេវាថែទាំ ទាំងថ្នាក់ខេត្ត ស្រុកទាំងអស់ (មន្ត្រីសុខាភិបាលត្រូវមានក្រមសិលធម៌ ចំពោះពលរដ្ឋ ដែលមកទទួលសេវា), ៨-អភិវឌ្ឍធនធានមនុស្ស (ពង្រឹកសមត្ថភាព ពង្រាយមន្ត្រីសុខាភិបាលមានបទពិសោធន៍ ចុះដល់ដ្ឋាន និងទី៩-ការអភិវឌ្ឋសុខភាព Digital។
ជាមួយការដាក់ចេញទាំង៩ចំនុចនោះដែរ ដេីម្បីអនុវត្តចំពោះកិច្ចការចំពោះមុខលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ក៏បានណែនាំដល់មន្ត្រីសុខាភិបាលក្រោមឱវាទ នូវ៣ចំនុចសំខាន់ៗ រួមមាន ៖ ១-ពង្រឹងមណ្ឌលសុខភាព ( ថែរក្សាហេដ្ឋារចនាសម្ព័ន្ធ ដែលមានស្រាប់, សម្ភារៈបរិក្ខា មណ្ឌលសុខភាព, ធនធានមនុស្ស ត្រូវបំពេញបន្ថែម ផ្តល់សេវាជូនពលរដ្ឋ ២៤ម៉ោងលេី២៤ម៉ោង), ២-ពង្រឹងប្រសិទ្ធភាព ទាំងមន្ទីរពេទ្យខេត្ត-ស្រុក និងថ្នាក់ជាតិ (ទាំងសេវាសាធារណៈ និងឯកជន) និងទី៣-ការពង្រឹងស្ថាប័ន បណ្តុះបណ្តាលភាពជាអ្នកដឹកនាំគ្រប់លំដាប់ថ្នាក់ (រៀបចំក្រុមការងារពិសេស កន្លែងប្រតិបត្តិការងាររៀងខ្លួន)៕
