ជនសង្ស័យប្រើប្រាស់អាវុធខុសច្បាប់០១នាក់ ត្រូវសមត្ថកិច្ចនគរបាលស្រុកវាលវែងចាប់ឃាត់ខ្លួន
ពោធិ៍សាត់៖ ជនសង្ស័យ០១នាក់ ប្រើប្រាស់អាវុធខុសច្បាប់ ត្រូវសមត្ថកិច្ចនៃអធិការដ្ឋាននគរបាលស្រុកវាលវែង ចាប់ឃាត់ខ្លួនក្រោយធ្វើសកម្មភាពប្រើប្រាស់អាវុធខុសច្បាប់ បង្កកាពភ័យខ្លាច អសន្តិសុខ ក្នុងមូលដ្ឋាន កាលពីវេលាម៉ោង ០២និង២០នាទី ទាបភ្លឺថ្ងៃទី០១ ខែសីហា ឆ្នាំ២០២៣ ។
លោកវរសេនីយ៍ឯក ធាង ឡេង អធិការនៃអធិការដ្ឋាននគរបាលស្រុកវាលវែង បានបញ្ជាក់ឲ្យដឹងថា ក្រោយសមត្ថកិច្ចប៉ុស្តិ៍នគរបាលរដ្ឋបាលប្រម៉ោយ បានទទួលព័ត៌មានពីលោក ឌិន ឌឿន ជាមេភូមិស្ទឹងថ្មី ឃុំប្រម៉ោយ ថាមានការប្រើប្រាស់អាវុធខុសច្បាប់ នៅចំណុចម៉ុងរី ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ នៅវេលាម៉ោងខាងលើ ។
សមត្ថកិច្ចនគរបាល បានធ្វើការរាយការណ៍ជូនថ្នាក់ដឹកនាំតាមលំដាប់ថ្នាក់ នឹងបានចេញប្រតិបត្តិការបង្ក្រាបករណីខាងលើ នៅវេលាម៉ោង ១៣និង០២នាទី ថ្ងៃទី០១ ខែសីហា ឆ្នាំ២០២៣ ដើម្បីធានាបានសន្តិសុខ សុវត្ថិភាព ជូនបងប្អូនប្រជាពលរដ្ឋ នៅពេលកម្លាំងនគរបាលស្រុក ចុះទៅដល់កន្លែងទីតាំងកើតហេតុខាងលើនិងបានឃាត់ខ្លួន ជនសង្ស័យឈ្មោះ តាំង ជី ភេទប្រុស អាយុ៣៨ឆ្នាំរស់នៅក្នុងភូមិ.ឃុំកើតហេតុ និងបានចាប់យក អាវុធមួយដើម ម៉ាកAK47ស្វាយបត់ មានលេខ 28661 គ្រាប់ចំនួន០៦គ្រាប់ និងបង់វែងចំនួន០១ ។
លោកអធិការបានបន្តថា ដោយមានការសម្របសម្រួលផ្នែកច្បាប់ពី ឯកឧត្តម ព្រះរាជអាជ្ញាអមសាលាដំបូងខេត្ត បច្ចុប្បន្នជនសង្ស័យនិងវត្ថុតាំង ត្រូវបានសមត្ថកិច្ចបញ្ជូនមកឃុំខ្លួនបណ្តោះអាសន្ននៅអធិការរដ្ឋាននគរបាលស្រុកវាលវែង ដើម្បីបន្តនីតិវិធី នឹងបញ្ជូនទៅជំនាញខេត្តចាត់ការបន្ត ៕
