ពិធីប្រកាសព្រះចៅអធិការពេញសិទ្ធិចំនួន៤អង្គក្នុងក្រុងកំពង់ឆ្នាំង ប្រកាសព្រះធម្មធរអនុគណពេញសិទ្ធិស្រុក និង ព្រះគ្រូ ក្នុងស្រុករលាប្អៀរ
នារសៀលថ្ងៃសៅរ៍១៣រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនិងថ្ងៃទី១៨ ខែកុម្ភៈ ឆ្នាំ២០២៣ នៅមហាកុដិ វត្តមុនីសុវណ្ណ ហៅ វត្តចំពុះក្អែក រាជធានីភ្នំពេញ មានពិធីប្រកាស តែងតាំងប្រគេន ព្រះចៅអធិការស្តីទីចំនួនបួនអង្គក្នុងក្រុងកំពង់ឆ្នាំង អោយឡើងទីជាព្រះចៅអធិការពេញសិទ្ធិ ប្រកាស ព្រះធម្មធរអនុគណពេញសិទ្ធិស្រុករលាប្អៀរ និង ព្រះគ្រូ ក្នុងស្រុករលាប្អៀរ ។ពិធីនេះប្រារព្ធក្រោមព្រះអធិបតីដ៏ខ្ពង់ខ្ពស់ សម្ដេចព្រះពោធិវ័ង្ស កិត្តិបណ្ឌិត អំ លឹមហេង សម្ដេចព្រះសង្ឃនាយករងទី១ នៃព្រះរាជាណាចក្រកម្ពុជា ដោយមានការនិមន្តនិងអញ្ជើញចូលរួមចូលរួមពីព្រះសិរីសម្មឥវង្ស ទេព ផាន ព្រះរាជាគណៈ ថ្នាក់ត្រី សមាជិកលេខាធិការដ្ឋានគណៈសង្ឃនាយក លោក សរ លាង ប្រធានមន្ទីរធម្មការ និង សាសនា ខេត្តកំពង់ឆ្នាំង ព្រះមេត្តិសត្ថា វង្ស កុសល ព្រះអនុគណស្រុករលាប្អៀរ ព្រះសិរីមង្គលមុនី ម៉ុច សៅលី និង ព្រះគ្រូសិរីធម្មវង្សា សេង ដា ព្រះជំនួយការសាលាគណខេត្តកំពង់ឆ្នាំង និមន្តចូលរួមផងដែរ។
យោងប្រកាសនីយប័ត្រ គណៈសង្ឃពុទ្ធសាសនា សម្តេចព្រះមហាសុមេធាធិបតី សម្តេចព្រះសង្ឃនាយកនៃព្រះរាជាណាចក្រកម្ពុជាសម្រេចតែងតាំងព្រះចៅអធិការស្តីទីចំនួនបួនអង្គក្នុងក្រុងកំពង់ឆ្នាំង និង អោយឡើងទីជា ព្រះចៅអធិការពេញសិទ្ធិ និង ព្រះធម្មធរអនុគណ ស្រុករលាប្អៀរ ព្រះគ្រូ ដូចមានព្រះនាមខាងក្រោមៈ
១.ត្រូវបានតែងតាំង ព្រះសរណមង្គល ប៉ុណ្យ ប៊ុនជីង ព្រះចៅអធិការស្តីទី ឲ្យឡេីងទីជា ព្រះចៅអធិការពេញសិទ្ធិ វត្ត ពោធិសិលារាម ហៅវត្តសំរោងស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង។
២.ត្រូវបានតែងតាំង ព្រះសិរីធម្មញ្ញាណ នុច មុនី ព្រះចៅអធិការស្តីទី ឲ្យឡេីងទីជា ព្រះចៅអធិការពេញសិទ្ធិ វត្តសោណ្ឌ្យារាម ហៅវត្តត្រពាំងបី ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង។
៣.ត្រូវបានតែងតាំង ព្រះវិមូលញ្ញាណ ឆន ឆុង ព្រះចៅអធិការស្តីទី ឲ្យឡេីងទីជា ព្រះចៅអធិការពេញសិទ្ធិវត្ត ទេពធិតារាម ហៅវត្តយាយទេព ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង។
៤.ត្រូវបានតែងតាំង ព្រះមង្គលានុរ័ក្ខ អំ សៃ ព្រះចៅអធិការស្តីទី ឲ្យឡេីងទីជា ព្រះចៅអធិការពេញសិទ្ធិ វត្តកាសេមរតនារាម ហៅវត្តធម្មយុត្តិ ស្ថិតក្នុងសង្កាត់ប្អេរ ក្រុងកំពង់ឆ្នាំង។
៥.ត្រូវបានតែងតាំង ព្រះគ្រូសិរីបញ្ញាញាណ អ៊ុច សុផល ព្រះសមុហ៍ អនុគណ អោយឡេីងទីជា ព្រះធម្មធរអនុគណ ស្រុករលាប្អៀរ។
៦.ត្រូវបានតែងតាំង ព្រះភិក្ខុ ជុំ វាសនា អោយឡេីងទីជា ព្រះគ្រូសរណមុនីវិសុទ្ធិ
៧.ត្រូវបានតែងតាំង ព្រះភិក្ខុ បេង សំបូរ អោយឡេីងទីជា ព្រះគ្រូសរណមុនីបញ្ញា នៃគណ:មហានិកាយ តទៅ
៨.ត្រូវបានតែងតាំង ភិក្ខុ ជឹម វាស្នា ព្រះចៅអធិការស្តីទី ឱ្យឡើងជាព្រះចៅអធិការវត្តសិប្បណិវ័ន តទៅ ស្ថិតនៅក្នុងឃុំអណ្តូងស្នាយ ស្រុករលាប្អៀ ខេត្តកំពង់ឆ្នាំង ។
ក្នុងឱកាសនោះ សម្តេចពោធិវ័ង្ស កិត្តិបណ្ឌិត អំ លឹមហេង បានមានព្រះបន្ទូលថា ការប្រកាសនិងប្រគេនព្រះចៅអធិការពេញសិទ្ធិ នាពេលនេះគឺដើម្បីបំពេញសេចក្តីត្រូវការ នូវតួនាទីភារកិច្ចរបស់មន្រ្តីសង្ឃ និង ជាការទទួលខុសត្រូវ លើកិច្ចការងារពង្រឹងវិស័យព្រះពុទ្ធសាសនានៅកម្ពុជាអោយកាន់តែរឹងមាំ ក្នុងការគោរពប្រតិបត្តិព្រះពុទ្ធសាសនា របស់ពុទ្ធសាសនិកជន ប្រកបដោយភាពជឿជាក់ តាមរដ្ឋធម្មនុញ្ញ ដែលបានចាត់ទុកថា ព្រះពុទ្ធសាសនាជាសាសនារបស់រដ្ឋ ។ តួនាទីយ៉ាងសំខាន់ ក្នុងការផ្ដល់ការអប់រំផ្នែកស្មារតី និងសីលធម៌សង្គម ដូចនេះក្នុងនាមជា ព្រះសង្ឃបានបំពេញតួនាទីរបស់ខ្លួនទៅតាមពុទ្ធានុញ្ញាតិ ដើម្បីជាគន្លងមួយសម្រាប់ព្រះសង្ឃក្នុងវត្តអនុវត្ត ដើម្បីរួមចំណែកក្នុងការគ្រប់គ្រងដឹកនាំ ថែរក្សាវិស័យព្រះពុទ្ធសាសនាអោយកាន់តែទទួលបានសមិទ្ធផលថ្មីៗនិងថែរក្សាវិស័យព្រះពុទ្ធសាសនាអោយស្ថិតស្ថេរគង់វង្សសម្រាប់ប្រជាពុទ្ធបរិស័ទជំនាន់ក្រោយគោរពបូជា៕
