ស្នងការដ្ឋាននគរបាលខេត្ដកំពង់ស្ពឺ បេីកកិច្ចប្រជុំជាមួយភ្នាក់ងារសន្ដិសុខឯកជន ធ្វើប្រតិបត្តិការនៅក្នុងភូមិសាស្ត្រខេត្តកំពង់ស្ពឺ ដេីម្បីពង្រឹងកិច្ចសហការ និងការអនុវត្ដមុខងារចំគោលដៅ
កំពង់ស្ពឺ ៖ នៅថ្ងៃសុក្រ ០៤រោច ខែអស្សុជ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី១៤ ខែតុលា ឆ្នាំ២០២២ ការិយាល័យគ្រប់គ្រងសន្តិសុខឯកជន នៃផែនការងារសន្តិសុខ បានប្រជុំជាមួយភ្នាក់ងារសន្ដិសុខឯកជន ដែលធ្វើប្រតិបត្តិការនៅក្នុងភូមិសាស្ត្រខេត្តកំពង់ស្ពឺ មានអាជ្ញាប័ណ្ណ និងភ្នាក់ងារសន្ដិសុខឯកជន ជ្រេីសរេីសប្រេីប្រាស់ផ្ទាល់ខ្លួន។
កិច្ចប្រជុំដឹកនាំដោយ
លោកវរសេនីយ៍ឯក មុំ យ៉ានមុន្នី ស្នងការរង ជំនួយដឹកនាំការិយាល័យសន្តិសុខឯកជន និងមានការអញ្ញេីញចូលរួមពីសំណាក់ លោកវរសេនីយ៍ទោ សៀង ងួន នាយការិយាល័យសន្តិសុខឯកជន លោកនាយរងការិយាល័យ លោកនាយផ្នែក នាយរងផ្នែក ចំណុះការិយាល័យទាំងអស់ និងអស់លោក តំណាងប្រធានតំបន់សន្ដិសុខឯកជន ប្រចាំខេត្តកំពង់ស្ពឺ ។
គោលបំណង ណែនាំផ្សព្វផ្សាយអំពីច្បាប់ និងការពិនិត្យរបាយការណ៍ស្ដីពីកិច្ចសហការរវាងនគរបាលនិងវិស័យឯកជនលេីការប្រតិបត្ដិការប្រចាំថៃ្ងក្នុងនោះដែរការធ្វើបញ្ជីបច្ចុប្បន្នភាព រកឃើញគោលដៅសន្ដិសុខថ្មី ដែលពុំបានចុះបញ្ជីហេីយមានការប្រតិបត្តិការនៅតាមបណ្ដាគោលដៅនានា ក្នុងន័យអនុវត្តផ្ទុយពីគោលការណ៍ច្បាប់ និងការណែនាំរបស់អគ្គស្នងការនគរបាលជាតិ។ បន្ថែមពីនេះរកឃេីញនូវបញ្ហាប្រឈមផ្សេងៗ ដែលបង្កឡេីងដោយភាគីម្ចាស់ទីតាំង និងអ្នកផ្ដល់សេវាបម្រេីនៅក្រុមហ៊ុន រោងចក្រ សហគ្រាស ដែលបានកំពុងតែប្រេីប្រាស់ភ្នាក់ងារផ្ទាល់ខ្លួន និងការផ្តល់សេវាសន្តិសុខឯកជន ជាដេីម។
សំណូមពរ និងវិធានការ ស្នេីសុំអោយក្រុមហ៊ុន ម្ចាស់ទីតាំងអាជីវកម្ម ត្រូវបង្កើនកិច្ចសហការ ការអនុវត្ដអោយស្របតាមគោលការណ៍ណែនាំ (អគ្គស្នងការនគរបាលជាតិ ស្នងការដ្ឋាននគរបាលខេត្ដ ការិយាល័យសន្តិសុខឯកជន និងច្បាប់ស្ដីពីការបង្កេីត និងប្រេីប្រាស់ភ្នាក់ងារសន្ដិសុខផ្ទាល់ខ្លួន និងសន្ដិសុខសេវាកម្ម ក្នុងករណីរកឃេីញថាម្ចាស់ទីតាំង–សហគ្រាស ក្រុមហ៊ុន បំពានច្បាប់ ជំនាញត្រូវជ្រេីសយក ការអនុវត្ដវិធានការរដ្ឋបាល និងវិធានការច្បាប់ កសាងសំណុំរឿងបញ្ជូនទៅតុលាការ)៕