ស្នងការដ្ឋាននគរបាលខេត្តកំពង់ស្ពឺ បេីកវគ្គបណ្ដុះបណ្ដាលដល់មន្រ្ដីនគរបាលជាគ្រូបង្គោល ស្ដីពីច្បាប់បោះឆ្នោត បទបញ្ជា នីតិវិធីសម្រាប់ការបោះឆ្នោត
កំពង់ស្ពឺ ៖ នាព្រឹកថៃ្ងសុក្រ ទី០៨ ខែមេសា ឆ្នាំ២០២២ នៅសាលប្រជុំស្នងការដ្ឋាននគរបាលខេត្តកំពង់ស្ពឺ បានធ្វើពិធីបេីកវគ្គបណ្ដុះបណ្ដាលដល់មន្រ្ដីនគរបាលជាគ្រូបង្គោល ស្ដីពីក្រមសីលធម៌យោធពលខេមរភូមិន្ទ នគរបាលជាតិ និងភ្នាក់ងារសន្ដិសុខបោះឆ្នោតសម្រាប់ការបោះឆ្នោតជ្រេីសរេីសក្រុមប្រឹក្សាឃុំ សង្កាត់ អាណត្តិទី៥ ប្រព្រឹត្តទៅនាថ្ងៃទី០៥ ខែមិថុនា ឆ្នាំ២០២២ខាងមុខ។
ពិធីស្ថិតក្រោមអធិបតីភាព លោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ និងលោក ប្រធាន គណៈកម្មាធិការរៀបចំការបោះឆ្នោតខេត្តកំពង់ស្ពឺ ព្រមទាំងតំណាងមេបញ្ជាការ កងកម្លាំងប្រដាប់អាវុធ រួមជាមួយលោក ហេង ពូង មេធាវីតំណាងគណៈកម្មាធិការរៀបចំការបោះឆ្នោតខេត្តកំពង់ស្ពឺ សមាសភាពជាគ្រូបង្គោលសម្រាប់ការបេីកវគ្គបណ្ដុះបណ្ដាល មកពីបណ្ដាអង្គភាពចំណុះស្នងការដ្ឋាន បញ្ជាការដ្ឋាននិងបញ្ជាការតំបន់ប្រតិបត្ដិការសឹករងកំពង់ស្ពឺ។
គោលបំណង ដើម្បីបង្កើនចំណេះដឹងអំពីនីតិវិធីផ្សេងៗពាក់ព័ន្ធនិងដំណេីរការរៀបចំប្រព្រឹត្ដទៅក្នុងដំណាក់កាលនៃការឃោសនាបោះឆ្នោត កិច្ចការពារការិយាល័យបោះឆ្នោត កំឡុងពេលបោះឆ្នោត រាប់សន្លឹកឆ្នោត និងការដឹកជញ្ជូនសន្លឹកឆ្នោត សម្ភារៈប្រើប្រាស់ក្នុងកំឡុងពេលបម្រេីឱ្យការបោះឆ្នោត អោយទទួលបានសន្ដិសុខ តម្លាភាព យុត្តិធម៌ សុវត្ថិភាពប្រកបដោយសេរីត្រឹមត្រូវ ស្របតាមលក្ខខណ្ឌវិនិច្ឆ័យដែលកំណ់ក្នុងច្បាប់បោះឆ្នោត ដែលប្រទេសកម្ពុជាបានធ្លាប់ដំណេីរការក្នុងរយៈពេលកន្លងមកដោយភាពសុក្រឹតត្រឹមត្រូវនិងទទួលយកបានពីគ្រប់ភាគីពាក់ព័ន្ធទាំងអស់ ស្ថាប័នជាតិ_អន្តរជាតិ៕