នគរបាលស្រុកមោងឫស្សី បង្រ្កាបគ្រឿងញៀនមួយករណី និងឃាត់ខ្លួនជនសង្ស័យ០២នាក់ អនុវត្តតាមច្បាប់
ខេត្តបាត់ដំបង៖ កាលពីថ្ងៃពុធ ៧រោច ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៣ ខែកុម្ភៈ ឆ្នាំ២០២២ វេលាម៉ោង១៤និង២០នាទី ចំណុចក្រុមទី០១ ភូមិរាមគន់ ឃុំគារ ស្រុកមោងឫស្សី ខេត្តបាត់ដំបង ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿងញៀន លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានដឹកនាំកម្លាំងផ្នែកជំនាញ រួមជាមួយកម្លាំងប៉ុស្តិ៍នគរបាលរដ្ឋបាលគារ បង្រ្កាបករណីរក្សាទុក ដោយខុសច្បាប់នូវសារធាតុញៀន ០១ករណី ក្នុងបទល្មើសជាក់ស្ដែង ដែលក្នុងកិច្ចប្រតិបត្តិការនេះបានធ្វើការឃាត់ខ្លួនជនសង្ស័យចំនួន០២នាក់គឺ៖
១-ឈ្មោះ មេត សុផាត ភេទប្រុស អាយុ ២៧ឆ្នាំ រស់នៅភូមិសួស្ដី ឃុំតាលាស់ ស្រុកមោងឫស្សី ខេត្តបាត់ដំបង។
២-ឈ្មោះ សេង វីតា ភេទប្រុស អាយុ ២៧ឆ្នាំ រស់នៅភូមិទី៤ ឃុំរកាខ្នុរ ស្រុក ក្រូចឆ្មារ ខេត្តកំពង់ចាម។ វត្ថុតាងចាប់យកបាន មានម្សៅក្រាមពណ៌សថ្លាច្រកក្នុងថង់ប្លាស្ទិកសថ្លាចំនួន ០៤កូនថង់ទម្ងន់៥.៤១ក្រាមទាំងសំបក (សង្ស័យមានសារធាតុញៀន), បំពង់ជក់គ្រឿងញៀនចំនួន០១, រថយន្តម៉ាកព្រូស ពណ៌ទឹកប្រាក់ ស៊េរីឆ្នាំ២០០៦ ពាក់ស្លាកលេខភ្នំពេញ២BH-៤៩០៣ និងទូរស័ព្ទដៃចំនួន០៣គ្រឿង។
ករណីខាងលើនេះ សមត្ថកិច្ចនគរបាលស្រុក បានរៀបចំកសាងសំណុំរឿងបញ្ជូនជនសង័្សយ និងវត្ថុតាងមកកាន់ការិយាល័យជំនាញចាត់ការបន្តតាមនីតិវិធីច្បាប់៕