បើកម៉ូតូបុកបង្គោលសញ្ញាចរាចរស្លាប់ម្នាក់ ម្នាក់ទៀតរងរបួស
បន្ទាយមានជ័យ ៖ បុរសម្នាក់បានស្លាប់នៅនឹងកន្លែង និងម្នាក់ទៀតរងរបួស ក្នុងហេតុការណ៍គ្រោះថ្នាក់ចរាចរណ៍បង្កដោយខ្លួនឯង បើកម៉ូតូបុកបង្គោលសញ្ញាចរាចរណ៍ នៅលើកំណាត់ផ្លូវជាតិលេខ៥៦A ត្រង់ចំណុចទល់មុខអនុវិទ្យាល័យតាបែនក្នុងភូមិគោករកា ឃុំតាបែន ស្រុកស្វាយចេក ខេត្តបន្ទាយមានជ័យ នៅវេលាម៉ោង០៧យប់ ថ្ងៃទី៣០ ខែមករា ឆ្នាំ២០២២ ។
នគរបាលស្រុកស្វាយចេក បានឲ្យដឹងថា ៖ ជនរងគ្រោះដែលស្លាប់ឈ្មោះ ខន អាយុ៣១ឆ្នាំ រស់នៅភូមិឬស្សី ឃុំឈ្នួរ ស្រុកព្រះនេត្រព្រះ ខេត្តបន្ទាយមានជ័យ អ្នកបើកបរម៉ូតូសណ្តោងរ៉ឺម៉កមួយគ្រឿងម៉ាកហុងដាឌ្រីមពណ៍ស្លាបកំផែមសេរីឆ្នាំ២០០៣ គ្មានផ្លាកលេខ និងអ្នករួមដំណើរឈ្មោះ ចយ ខី ភេទប្រុស អាយុ៣១ឆ្នាំ រស់នៅភូមិគោកព្រិចត្បួង ឃុំតាផូ ស្រុកស្វាយចេក ខេត្តបន្ទាយមានជ័យ។
នគរបាលបានបញ្ជាក់ថា ៖ នៅមុនពេលកើតហេតុ អ្នកបើកបរម៉ូតូសណ្តោងរ៉ឺម៉ក បានធ្វើដំណើរពីទិសខាងជើងទៅត្បូងក្នុងស្ថានភាពស្រវឹង បើកលឿននិងចាំងភ្លើងឡានបញ្ច្រាសទិសពេលមកដល់ចំណុចកើតហេតុបានរេចង្កូតបុកជាមួយបង្គោលសញ្ញាចរាចរណ៍ បណ្តាលឲ្យអ្នកបើកម៉ូតូស្លាប់នៅនឹងកន្លែង ចំណែកអ្នករួមដំណើររងរបួសបញ្ជូនទៅមន្ទីរពេទ្យបង្អែកស្រុកស្វាយចេក ។សពបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី បន្ទាប់ពីនគរបាលបានពិនិត្យរួច ៕
