លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានដឹកនាំកម្លាំងនគរបាលចូលរួមជាមួយរដ្ឋបាលខេត្តកំពង់ស្ពឺ ប្រារព្ធពិធីគោរពព្រះវិញ្ញាណក្ខ័ន្ធ ព្រះមហាវីរក្សត្រ ព្រះបរមរតនកោដ្ឋគំរប់ខួប ៩ឆ្នាំ
កំពង់ស្ពឺ ៖ នាព្រឹកថ្ងៃព្រហស្បតិ៍ ៨កើត ខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៤ ខែតុលា ឆ្នាំ២០២១ នៅមុខសាលាខេត្តកំពង់ស្ពឺ មានប្រារព្ធព្រះរាជពិធី គោរពព្រះវិញ្ញាណក្ខ័ន្ធព្រះករុណាព្រះបាទសម្តេចព្រះនរោត្តមសីហនុ ព្រះបរមរតនកោដ្ឋគម្រប់ខួប៩ឆ្នាំ មានការចូលរួម ថ្នាក់ដឹកនាំខេត្ត មន្រ្តីរាជការអង្គភាពជុំវិញខេត្ត ក្នុងនោះកងកម្លាំងនគរបាល នៃស្នងការដ្ឋាននគរបាលខេត្ដកំពង់ស្ពឺ ដឹកនាំដោយលោកឧត្ដមសេនីយ៍ទោ សម សាមួន ស្នងការនគរបាលខេត្ដ រួមមានលោកស្នងការរងនគរបាលខេត្ត ឯកឧត្ដម លោកជំទាវប្រធានក្រុមប្រឹក្សាខេត្ដ ឯកឧត្ដម លោកជំទាវ អភិបាល អភិបាលរងនៃគណៈអភិបាលខេត្ដ មន្រ្តីរាជការ មន្ទីរស្ថាប័នជុំវិញខេត្ត កងកម្លាំងប្រដាប់អាវុធទាំងបី បន្ទាប់ពីព្រះអង្គយាងចូលទិវង្គត កាលពីថ្ងៃទី១៥ តុលា ឆ្នាំ២០១២ ។
កម្មវិធីបានប្រព្រឹត្តទៅតាមទំនាមទម្លាប់ និងប្រពៃណី នៃព្រះពុទ្ធសាសនា ដោយមានការប្រគេនស្លាដក កន្រ្កកផ្លែឈេី រួមជាមួយចង្ហាន់ព្រះសង្ឃ ដើម្បីឧទ្ទិសថ្វាយព្រះរាជកុសលដល់ព្រះវិញ្ញាណក្ខ័ន្ធ ព្រះករុណាព្រះបាទសម្តេចព្រះនរោត្តមសីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ៕