ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម សូមធ្វេីការបកស្រាយចំពោះករណីព័ត៌មានមិនពិត
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម សូមជម្រាបជូនសាធារណជន អ្នកសារព័ត៌មាន ពិសេសបណ្ដាញទំនាក់ទំនងសង្គមជ្រាបថា នាថ្ងៃទី០៦ ខែតុលា ឆ្នាំ២០២១ បណ្តាញសារព័ត៌មានមានឈ្មោះ “គេហទំព័រ កងមាស” ដែលបានចុះផ្សាយមានខ្លឹមសារថា មានករណីបេីកល្បែងសុីសងខុសច្បាប់ មាន់ជល់ ហាយឡាយ បង្គប់ អាប៉ោង ម្ចាស់ទីតាំងឈ្មោះ ចូច ស្ថិតនៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម នៅតែបើកដំណើរការបានយ៉ាងរលូន ដោយសារតែ សមត្ថកិច្ចក្នុងមូលដ្ឋាន មិនហ៊ានប៉ះពាល់ ព្រោះមានខ្សែធំ ។
ពាក់ព័ន្ធករណីខាងលេីនេះ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានចាត់ឲ្យកម្លាំងជំនាញផែនការងារនគរបាលព្រហ្មទណ្ឌ សហការជាមួយកម្លាំងជំនាញរបស់អធិការដ្ឋាននគរបាលស្រុកបាធាយ , កំលាំងរបស់ប៉ុស្តិ៍នគរបាលរដ្ឋបាលផ្អាវ ដឹកនាំដោយលោកវរសេនីយ៍ឯក សំ ណាល់ អធិការនគរបាលស្រុក និងអាជ្ញាធរមូលដ្ឋាន ចុះស្រាវជ្រាវស៊ើបអង្កេត ដល់ទីតាំងខាងលើផ្ទាល់ ។
ជាលទ្ធផល នៅពេលដែលកម្លាំងជំនាញចុះដល់ ពិនិត្យឃើញថា ពុំមានសកម្មភាពលួចលេងល្បែងស៊ីសងជល់មាន់ ឡាយតាមប្រព័ន្ធអនឡាញ និងអាប៉ោង ដូចការចុះផ្សាយរបស់សារព័ត៌មាននោះឡើយ ។
ផ្អែកតាមការបំភ្លឺរបស់ប្រជាពលរដ្ឋដែលរស់នៅជុំវិញទីតាំងខាងលើ រួមជាមួយអាជ្ញាធរមូលដ្ឋាន បានបញ្ជាក់ថា ទីតាំងខាងលេីនេះ មិនមានការលួចលេងល្បែងសុីសងខុសច្បាប់ឡេីយ គឺបេីកលក់កាហ្វេធម្មតាតែប៉ុណ្ណោះ ។
រហូតដល់វេលាម៉ោង ០៨ព្រឹក ថ្ងៃទី០៧ ខែតុលា ឆ្នាំ២០២១នេះ មានឈ្មោះ ជឺ ប៊ុនថន ហៅចូច ភេទប្រុស អាយុ៤១ឆ្នាំ រស់នៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម ដែលជាម្ចាស់ផ្ទះ ដែលមានទីតាំងដូចការចុះផ្សាយរបស់គេហទំព័រ កងមាស បានអញ្ជេីញមកអធិការដ្ឋាននគរបាលស្រុកបាធាយ ក៏បានដាក់ពាក្យបណ្ដឹងទៅលើម្ចាស់គេហទំព័រ កងមាស និងបក្សពួក មានលេខទូរស័ព្ទ ០៧៧ ៩០៦៦៦៤ ដែលបានធ្វេីសកម្មភាពលួចថតផ្ទះរបស់ខ្លួន ហេីយយកទៅចុះផ្សាយលេីគេហទំព័រ (គេហទំព័រ កងមាស) ថាមានការបេីកល្បែងសុីសងខុសច្បាប់ មាន់ជល់ ហាយឡាយ បង្កប់អាប៉ោង ដែលជាការចុះផ្សាយព័ត៌មានបំភ្លៃការពិតទាំងស្រុង ជាហេតុធ្វើឲ្យប៉ះពាល់ដល់កិត្តិយសបុគ្គល និងកិត្តិយសរបស់អាជ្ញាធរមានសមត្ថកិច្ចផងដែរ ។
ឆ្លៀតក្នុងឱកាសនេះ យើងខ្ញុំសូមអំពាវនាវដល់សាធារណជន អ្នកសារព័ត៌មាន និងពិសេសបណ្ដាញទំនាក់ទំនងសង្គម សូមមេត្តាចៀសវាងផ្សព្វផ្សាយព័ត៌មានពុំមានមូលដ្ឋានស៊ើបបញ្ជាក់ច្បាស់លាស់ ឬយករូបភាពសកម្មភាពល្មើសចាស់ៗដែលត្រូវបានសមត្ថកិច្ចបង្ក្រាបរួចមកហើយនោះ មកច្នៃប្រឌិតបង្កើតជារូបភាព និងព័ត៌មានថ្មីដែលនាំឲ្យមហាជនភាន់ច្រឡំចំពោះស្ថានការណ៍សន្តិសុខ សណ្តាប់ធ្នាប់សាធារណៈ និងបង្កការលំបាកដល់ការអនុវត្តវិធានការជំនាញរបស់សមត្ថកិច្ចនគរបាល។
