ក្រសោបក្រុមចោរកាច់សោម៉ូតូ រួមនឹងមេក្លោងបានចំនួន៣នាក់
ខេត្តបាត់ដំបង៖ កាលពីថ្ងៃពុធ ទី១៤ខែកក្កដា ឆ្នាំ២០២១ វេលាម៉ោង ០៩និង៣៧នាទី នៅចំណុចផ្លូវលំ ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង អនុវត្តតាមការបញ្ជាផ្ទាល់ពីលោកឧត្ដមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ក៏ដូចជាមតិរបស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងដោយមានការសម្របសម្រួលលើនីតិវិធីពីឯកឧត្តម កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបងផងនោះ លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងក្រុមអន្តរាគមន៍ បង្ការបង្ក្រាប សហការជាមួយកម្លាំង
ការិយាល័យជំនាញចុះប្រតិបត្តិការបង្ក្រាបករណីលួចមានស្ថានទម្ងន់ទោស (កាច់សោម៉ូតូ) ០១ករណី នឹងបានធ្វេីការឃាត់ខ្លួនជនសង្ស័យចំនួន៣នាក់ មកកាន់ស្នងការដ្ឋាននគរបាលខេត្តបាត់
ដំបង ព្រមទាំងដកហូតបានសម្ភារៈភស្តុតាងមួយចំនួន។ ជនសង័្សយមានឈ្មោះដូចខាងក្រោមៈ
១-ឈ្មោះ កែវ សុខុម ហៅ ម៉ាប់ ភេទប្រុស អាយុ២៦ឆ្នាំ ស្នាក់នៅបន្ទប់ជួល ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង (ជាអ្នកធ្វេីសកម្មភាព)។
២-ឈ្មោះ សុខ ផានិត ភេទប្រុស អាយុ៤៧ឆ្នាំ មានទីលំនៅភូមិចំការឫស្សី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង (អតីតជាអ្នកសារព័ត៌មាន និងជាអ្នកចូលរួមនិងផ្តេីមគំនិត)។
៣-ឈ្មោះ គន្ធ វុទ្ធា ហៅធា ភេទប្រុស អាយុ២៧ឆ្នាំ ស្នាក់នៅបន្ទប់ជួលស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង(ជាអ្នកចូលរួម)។
វត្ថុតាងដកហូតបានរួមមាន៖ ដង្កាប់ចំនួន៣, កន្ត្រៃសម្រាប់កាត់ចំនួន៣, កូនកាំបិតចំនួន១, មួកសុវត្ថិភាពពណ៌ខ្មៅចំនួន១, ស្លាកលេខ មានលេខ បាត់ដំបង 1AK-4724, ទូរស័ព្ទដៃសេរីចាស់ ចំនួន២គ្រឿង,សោសម្រាប់ដោះគ្រឿងម៉ូតូមួយចំនួន, កូនសោម៉ូតូ ចំនួន១,សោលេខ៨មានរាងអក្សរអិលLសម្រាប់ធ្វេីសកម្មភាពកាច់សោម៉ូតូចំនួន១,ដែករាងសំប៉ែតចុងស្រួច (ផ្លែសម្រាប់កាច់សោរម៉ូតូ) ចំនួន១, ម៉ូតូម៉ាកហុងដាឌ្រីម សេ១២៥ ពណ៌ខ្មៅ សេរីឆ្នាំ២០២០ លេខតួ.ម៉ាស៊ីន ៥៧២៧៧៣៨ គ្មានស្លាកលេខចំនួន១គ្រឿង (ជារបស់ជនរងគ្រោះ),ម៉ូតូម៉ាកហុងដា PCX ពណ៌ស សេរីឆ្នាំ២០១៣ ពាក់ស្លាកលេខ ភ្នំពេញ 1BT-5020 ចំនួន១គ្រឿង (មធ្យោបាយជិះធ្វេីសកម្មភាព) ។
លោកវរសេនីយ៍ឯក ឈឿង គឹមសុង បានឱ្យដឹងថា ជនសង្ស័យឈ្មោះ សុខ ផានិត (អតីតជាអ្នកសារព័ត៌មាន) និងមានទីលំនៅក្នុងសង្កាត់ព្រែកព្រះស្តេច ក្រុងបាត់ដំបង គឺជាអ្នកបណ្តុះ
បណ្តាលជំនាញលួចកាច់សោម៉ូតូដល់ក្មេងៗជាជនសង័្សយខាងលេី និងបានដឹកពួកគេទៅធ្វេីសកម្មភាពលួចម៉ូតូ។ ជាក់ស្តែងនៅថ្ងៃទី១៣ ខែកក្កដា ឆ្នាំ២០២១ វេលាម៉ោង ០២និង២៨នាទី រំលងអាធ្រាត្រឈានចូលថ្ងៃទី១៤ ខែកក្កដា ឆ្នាំ២០២១ ឈ្មោះ សុខ ផានិត នេះ បានជិះម៉ូតូដឹកក្រុមរបស់ខ្លួនទៅធ្វេីសកម្មភាពកាច់សោយកម៉ូតូ របស់ជនរងគ្រោះ ឈ្មោះ ស៊ិន ឃុន ភេទស្រី អាយុ៤៦ឆ្នាំ រស់នៅចំណុចភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង ក្នុងខណៈដែលជនរងគ្រោះបានចាក់សោកទុកនៅខាងក្រោមផ្ទះ។ នៅថ្ងៃដែលធ្វេីសកម្មភាពនេះដែរ ក៏ត្រូវបានសមត្ថកិច្ចនគរបាលស្រាវជ្រាវនិងក្រសោបបានទាំងសម្បុកតែម្តង។
បច្ចុប្បន្ននគរបាលការិយាល័យជំនាញ នៃស្នងការដ្ឋាននគរបាលខេត្តបាត់ដំបង បានរៀបចំកសាងសំណុំរឿងបញ្ជូនទៅសាលាដំបូងខេត្តបាត់ដំបង ចាត់ការបន្តតាមច្បាប់៕
