នគរបាលស្រុកមោងឫស្សី ចុះអនុវត្តដីកាបង្គាប់ឱ្យនាំខ្លួនបុរសម្នាក់ក្នុងករណីជួញដូរគ្រឿងញៀន
ខេត្តបាត់ដំបង៖ ដោយអនុវត្តតាមមតិដឹកនាំរបស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបងជាប្រចាំ រួមជាមួយយោបល់របស់លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿងញៀន នៅថ្ងៃព្រហស្បតិ៍ ទី២៤ ខែមិថុនា ឆ្នាំ២០២១ វេលាម៉ោង១៥ និង១០នាទី នៅចំណុចក្រុមទី០៩ ភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានដឹកនាំកម្លាំងចុះអនុវត្តដីកាបង្គាប់ឱ្យនាំខ្លួនមួយករណី តាមដីកាលេខ៣៥៧ ត.ព្រ ចុះថ្ងៃទី១១ ខែមិថុនា ឆ្នាំ២០២១ របស់លោក ឆែ វីរៈ ចៅក្រមស៊ើបសួរនៃសាលាដំបូងខេត្តបាត់ដំបង ដោយបង្គាប់ឱ្យនាំខ្លួនឈ្មោះ អឿន ដារ៉ា ហៅ គង់ ភេទប្រុស អាយុ ៣២ឆ្នាំ រស់នៅក្រុមទី០៩ ភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង ជាប់ចោទពីបទជួញដូរដោយខុសច្បាប់នូវសារធាតុញៀន ប្រព្រឹត្តនៅចំណុចភូមិថ្នល់បត់ ឃុំប្ញស្សីក្រាំង ស្រុកមោងប្ញស្សី ខេត្តបាត់ដំបង កាលពីថ្ងៃទី១៥ ខែមេសា ឆ្នាំ២០២១ ។
បច្ចុប្បន្នជនត្រូវចោទខាងលើ ត្រូវបាននគរបាលស្រុកមោងឫស្សី រៀបចំបញ្ជូនមកការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីអនុវត្តបន្តតាមនីតិវិធី៕
