កុមារកំព្រារ នៅក្នុងមណ្ឌលសង្គ្រោះជនអស់សង្ឃឹម បន្ទាយមានជ័យ ៦២នាក់ ទទួលបានអំណោយទឹកដោះគោ ម៉ាស និងអាល់កុល ពីឯកឧត្តម លីវ សុភក្រ្តា តាមរយៈក្រុមការងារ
បន្ទាយមានជ័យ ៖ រសៀលថ្ងៃច័ន្ទ ទី១៤ ខែមិថុនា ឆ្នាំ២០២១ លោក ខុន សុខុម ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តបន្ទាយមានជ័យ និងមន្រ្តីក្រោមឱវាទ បានអញ្ចេីញសំណេះសំណាលសួរសុខទុក្ខ និងនាំយកទឹកដោះគោ(Lactel Milk & Go) ១២០០ដប, ម៉ាស(FACEMASKVN) ១មុឺនម៉ាស ,អាកុល ជាអំណោយរបស់ឯកឧត្តម លីវ សុភក្រ្តា អនុរដ្ឋលេខាធិការក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាសមាជិកក្រុមការងាររាជរដ្ឋាភិបាលចុះជួយខេត្តបន្ទាយមានជ័យ ប្រគល់ជូនក្មេងកំព្រា៦២នាក់(ស្រី៣៤នាក់) កំពុងស្នាក់នៅមណ្ឌលថែទាំកុមារ «សង្គ្រោះជនអស់សង្ឃឹម បន្ទាយមានជ័យ» (place of rescue Bantey Meanchey) ស្ថិតក្នុងភូមិឫស្សីក្រោក ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
នាឱកាសនោះលោក ខុន សុខុម ប្រធានមន្ទីរ បានមានប្រសាសន៍ណែនាំដល់ក្មួយៗត្រូវតស៊ូខិតខំរៀនសូត្រ ត្រូវធ្វេីខ្លួនជាពលរដ្ឋល្អដេីម្បីចូលរួមអភិវឌ្ឍន៍សង្គមជាតិរបស់យេីងឲ្យកាន់តែរីកចម្រេីន។ ទន្ទឹមនឹងនេះដោយសារបច្ចុប្បន្នកម្ពុជាកំពុងរងគ្រោះដោយវិបត្តិកូវីដ-១៩ ក្មួយៗក៏ត្រូវតែមានអនាម័យឲ្យបានជាប់ជាប្រចាំ តាមរយៈការលាងដៃជាមួយសាប៊ូ អាល់កុល ឬជែលសម្លាប់មេរោគជាប្រចាំ ត្រូវពាក់ម៉ាស់ជាដេីម ហេីយកុំភ្លេចអនុវត្តវិធានការ” ៣កាពារ ៣កុំ” ឲ្យបានទាំងអស់គ្នា និងត្រូវស្តាប់នូវដំបូន្មានរបស់លោកប្រធានមណ្ឌល ធ្វេីជាកូន សិស្សល្អ មិត្តភ័ក្ដិល្អ ដេីម្បីអនាគតសង្គមជាតិរបស់យេីងនៅថ្ងៃខាងមុខ។
លោក រិញ ប៊ុនឈួយ ប្រធានមណ្ឌលថែទាំកុមារ «សង្គ្រោះជនអស់សង្ឃឹម បន្ទាយមានជ័យ» បានបង្ហាញនូវការអរគុណចំពោះទង្វេីសប្បុរសដ៏គួរឲ្យគោរពមួយនេះ ពិសេសឯកឧត្តម លីវ សុភក្រ្តា អនុរដ្ឋលេខាធិការក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាសមាជិកក្រុមការងាររាជរដ្ឋាភិបាលចុះជួយខេត្តបន្ទាយមានជ័យ ដែលតែងតែនាំយកអំណោយមកជួយដល់កុមារដែលនៅក្នុងមណ្ឌល។ លោកក៏បានជូនពរ ឯកឧត្តមអនុរដ្ឋលេខាធិការ ក៏ដូចជាលោកប្រធានមន្ទីរនិងក្រុមការងារ ជួបប្រទះតែពុទ្ឋពរ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡេីយ និងចៀសផុតពីជម្ងឺកូវីដ-១៩។
គួររំលឹកផងដែរថា ៖ នាពេលកន្លងមក ឯកឧត្តមតែងតែជួយផ្គត់ផ្គង់ជូនមណ្ឌលខាងលេីជាអាហាររូបត្ថម្ភ និង សម្ភារៈផ្សេងៗជូនមណ្ឌលសម្រាប់ដោះស្រាយការចំណាយប្រចាំថ្ងៃ៕