បុរសម្នាក់ដែលគេប្រកាសថាបាត់ខ្លួន តាមពិតជាឃាតករសម្លាប់ប្រពន្ធខ្លួនឯង
ខេត្តបាត់ដំបង៖ ដោយអនុវត្តតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង និងដោយបានការសម្របសម្រួលលេីនីតិវិធី ពីឯកឧត្តម កែវ សុជាតិ ព្រះរាអាជ្ញានៃអយ្យការអមសាលាដំបូងខេត្តបាត់ដំបង លោកវរសេនីយឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ បានដឹកនាំកម្លាំងជំនាញការិយាល័យនគរបានព្រហ្មទណ្ឌកម្រិតធ្ងន់ សហការជាមួយកម្លាំងជំនាញនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ កម្លាំងជំនាញនៃស្នងការដ្ឋាននគរបាលរាជធានីភ្នំពេញ រួមជាមួយកម្លាំងនគរបាលនៃអធិការដ្ឋាននគរបាលស្រុកសំឡូត និងកម្លាំងនគរបាលនៃអធិការដ្ឋាននគរបាលស្រុករតនមណ្ឌល នៅថ្ងៃសៅរ៍ ៣កេីត ខែបឋមឋាឍ ឆ្នាំឆ្លូវ ព.ស ២៥៦៥ ត្រូវនឹងថ្ងៃទី១២ ខែមិថុនា ឆ្នាំ២០២១ បានធ្វើការឃាត់ខ្លួនជនសង្ស័យម្នាក់នៅចំណុចផ្ទះសំណាក់មួយកន្លែងក្នុងស្រុករតនមណ្ឌលខេត្តបាត់ដំបង ខណ:ដែលជនសង័្សយរូបនេះកំពុងសំងំលាក់ខ្លួននៅទីនោះ។
ជនសង័្សយមានឈ្មោះ ស៊ាន ហួរ ភេទប្រុស អាយុ ៥៩ឆ្នាំ មានទីលំនៅផ្ទះលេខ៥៤៣ ផ្លូវលេខ៥៩៨ សង្កាត់ទំនប់ ខ័ណ្ឌសែនសុខ រាជធានីភ្នំពេញ ដែលជាឃាតករសម្លាប់ប្រពន្ធរបស់ខ្លួននាពេលកន្លងទៅ និងបានរត់គេចខ្លួនមកសំងំនៅខេត្តបាត់ដំបង។
សូមជម្រាបជូនថា កាលពីថ្ងៃទី០៩ ខែមិថុនា ឆ្នាំ២០២១ ជនសង័្សយខាងលេីបានសម្លាប់ប្រពន្ធរបស់ខ្លួនឈ្មោះ គង់ វុទ្ធី អាយុ ៥១ឆ្នាំ រួចច្រកចូលទៅក្នុងវ៉ាលីហេីយយកទៅបោះចោលនៅក្នុងទឹកទន្លេឯខេត្តកំពង់ចាម មុនពេលគេចខ្លួន មូលហេតុដែលឈានដល់ការសម្លាប់ប្រពន្ធខ្លួនឯងនេះគឺ ដោយសារគាត់ជាមួយប្រពន្ធមានទំនាស់រស់នៅមិនចុះសម្រុងជាមួយគ្នាជាប្រចាំ រហូតឈានដល់ការប្តឹងសុំលែងលះទៅតុលាការពីភាគីប្រពន្ធ ហេីយមុនការសម្លាប់នេះគាត់ និងប្រពន្ធត្រូវចូលទៅសវនាការនៅតុលាការចំពោះពាក្យបណ្តឹងពីការសុំលែងលះនេះ។
នៅពេលនេះសមត្ថកិច្ចនគរបាលខេត្តបាត់ដំបង បានប្រគល់ជនសង័្សយខាងលេីជូនទៅកម្លាំងជំនាញ នៃនាយកដ្ឋានព្រហ្មទណ្ឌដេីម្បីចាត់ការបន្តតាមនីតិវិធី៕