អភិបាលខេត្តប៉ៃលិន ចុះពិនិត្យមើលយុទ្ធនាការ ការចាក់វ៉ាក់សាំងបង្ការជម្ងឺកូវីដ-១៩ ដំណាក់កាលទី២ នៅតាមណ្ឌលចាក់វ៉ាក់សាំងក្នុងខេត្ត
ប៉ៃលិន៖ ថ្ងៃទី១១ ខែមេសា ឆ្នាំ២០២១ លោកជំទាវ បាន ស្រីមុំ អភិបាលខេត្ត និងឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន អមដំណើរដោយថ្នាក់ដឹកនាំ និងមន្ត្រីជំនាញ ព្រមទាំងក្រុមការងារ បានអញ្ជើញចុះពិនិត្យមើលយុទ្ធនាការ ការចាក់វ៉ាកសាំងបង្ការកូវីដ–១៩ ជំហានទី២ ប្រភេទ Sinovac (ស៊ីណូវ៉ាក់) ដល់មន្រ្តីរាជការតាមបណ្ដាមន្ទីរអង្គភាពជុំវិញខេត្ត និងអតីតយុទ្ធជន នៅតាមមណ្ឌលចាក់វ៉ាក់ សាំង ក្នុង ក្របខណ្ឌទូទាំងខេត្តប៉ៃលិន។
លោកជំទាវ បាន ស្រីមុំ អភិបាលខេត្តប៉ៃលិន បានមានប្រសាសន៍លើកឡើងថា៖ ការចូលរួមចាក់វ៉ាក់ សាំង បង្ការជំងឺកូវីដ–១៩ ដោយការស្ម័គ្រចិត្ដ គឺជាកាតព្វកិច្ច និងជាការចូលរួមអនុវត្ដន៍នូវវិធានការសុខាភិបាល ដើម្បីការពារការចម្លងរីករាលដាលជម្ងឺកូវីដ–១៩នៅក្នុងសហគមន៍ និងក្នុងប្រទេស ក្រោមការយកចិត្តទុក្ខដាក់ ខ្ពស់ពីសំណាក់ រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។
នៅក្នុងឱកាសនោះផងដែរ លោកជំទាវ បាន ស្រីមុំ ក៍បានមានប្រសាសន៍ផ្តាំផ្ញើដល់បងប្អូន ប្រជាពលរដ្ឋ នៅគ្រប់មូលដ្ឋានទាំងអស់មិនត្រូវភ្លេចខ្លួន និងត្រូវមានការប្រុងប្រយ័ត្នខ្ពស់ ដោយអនុវត្តន៍នូវវិធាន ការ ការពារ COVID-19 របស់សម្តេចតេជោ ហ៊ុន សែន គឺ៣ការពារ និង៣កុំ ជាពិសេសត្រូវខិតខំប្រកបមុខរបរ និងធ្វើស្រែចំការ ដាំដំណាំរួមផ្សំផ្សេងៗដើម្បីរួមចំណែកលើកកម្ពស់ជីវភាពក្នុងគ្រួសារប្រចាំថ្ងៃ កុំយកពេល វេលាទំនេរទៅប្រព្រឹត្តិអំពើខុសច្បាប់ ដូចជាល្បែងស៊ីសងផ្សេងៗជាដើម ត្រូវអប់រំកូនចៅ និងខ្លួនឯងជាសចាក ឆ្ងាយពីគ្រឿងញៀន។
បើតាមការបញ្ជាក់របស់ លោក ស្លះ យូ ប្រធានមន្ទីរសុខាភិបាលខេត្តប៉ៃលិន បានឱ្យដឹងថា៖ សម្រាប់ខេត្តប៉ៃលិន គណៈកម្មការចាក់វ៉ាក់សាំងខេត្ត បានធ្វើយុទ្ធនាការចាក់វ៉ា ក់សាំង បង្ការជំងឺកូវីដ–១៩ ដំណាក់កាលទី១ ប្រភេទ ស៊ីណូហ្វាម ដែលជាជំនួយរបស់សាធារណៈរដ្ឋប្រជាមានិតចិន ដល់ថ្នាក់ដឹកនាំ មន្ត្រីរាជការ និងកងកម្លាំប្រដាប់អាវុធ ហើយនៅដំណាក់កាលទី២ នេះ គឺប្រើវ៉ាក់សាំងបង្ការជំងឺកូវីដ–១៩ ប្រភេទ ស៊ីណូវ៉ាក់ ដោយធ្វើយុទ្ធនាការចាក់ជូនដល់មន្ត្រីរាជការ និងអតីតយុទ្ធជន។