រដ្ឋបាលខេត្តក្រចេះ រៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំទី២ នៅស្រុកចិត្របុរី
ក្រចេះ ៖ ព្រឹកថ្ងៃអង្គារ ១០រោច ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១០ ខែវិច្ឆិកា ឆ្នាំ២០២០ រដ្ឋបាលខេត្តក្រចេះ បានរៀបចំវេទិកាផ្សព្វផ្សាយ និងពិគ្រោះយោបល់ក្រុមប្រឹក្សាខេត្ត អាណត្តិទី៣ ឆ្នាំទី២ ក្រោមអធិបតីភាពឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត និងឯកឧត្តម ទុយ ប៊ុនសេរីរ័ត្នមុនី អភិបាលរងខេត្ត ដោយមានការអញ្ជើញចូលរួមពីឯកឧត្តម លោកជំទាវ សមាជិកសមាជិកាក្រុមប្រឹក្សាខេត្ត មន្ទីរអង្គភាពជុំវិញខេត្ត អង្គភាពជុំវិញខេត្ត និងក្រុមប្រឹក្សាស្រុក–ឃុំផងដែរ ។
ការរៀបចំប្រារព្ធធ្វើវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត នាថ្ងៃនេះ គឺដើម្បីបង្កើតឡើងនូវវប្បធម៌ នៃការពិភាក្សា និងការលើកកម្ពស់គណនេយ្យភាព តាមបែបប្រជាធិបតេយ្យ ក្នុងគោលបំណង៖–១.ផ្តល់ព័ត៌មានអំពីសមិទ្ធផលនានាដែលរដ្ឋបាលខេត្តសម្រេចបាន និងសកម្មភាពអាទិភាព នៃការអភិវឌ្ឍសម្រាប់ឆ្នាំ២០២០ –២.ផ្តល់ឱកាសឱ្យប្រជាពលរដ្ឋចូលរួមក្នុងការពិភាក្សាលើរបាយការណ៍នានា របស់រដ្ឋបាលខេត្ត ទទួលយកនូវអនុសាសន៍ សំណូមពររបស់ប្រជាពលរដ្ឋ ដើម្បីពិភាក្សា និងធ្វើការឆ្លើយតបប្រកបប្រសិទ្ធភាព ក្នុងការផ្ដល់សេវាសាធារណៈ –៣.ធានាបានភាពជាតំណាងសាធារណៈ យ៉ាងពិតប្រាកដ ក្នុងការពង្រឹងលើអភិបាលកិច្ចមូលដ្ឋាន និងការអភិវឌ្ឍមូលដ្ឋាន តាមបែបប្រជាធិបតេយ្យ និងមានការចូលរួមគ្រប់ភាគីពាក់ព័ន្ធ –៤.ធានាថាក្រុមប្រឹក្សាមានគណនេយ្យភាពចំពោះប្រជាពលរដ្ឋ ផ្តល់ឱកាសដល់ប្រជាពលរដ្ឋមានសិទ្ធិចូលរួម និងលើកឡើងនូវសំណួរពាក់ព័ន្ធបញ្ហានានា ក្នុងមូលដ្ឋានរបស់ខ្លួន និង៥.ធានាឆ្លើយតបបាន តាមតម្រូវការចាំបាច់របស់ប្រជាពលរដ្ឋ និងការឆ្លើយតបចំពោះផលប្រយោជន៍របស់ប្រជាពលរដ្ឋ ទាំងបុរស និងស្ត្រីឱ្យបានស្មើៗគ្នា ។
ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត បានថ្លែងនូវការកោតសរសើរ និងថ្លែងនូវអំណរគុណដ៏ជ្រាលជ្រៅចំពោះលោកលោកស្រីតំណាងប្រជាពលរដ្ឋដែលបានមកចូលរួមក្នុង វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ដោយបានលើកឡើងជាសំណួរ និងសំណូមពរផ្សេងៗក្នុងគោលបំណងដើម្បីសហគមន៍ ភូមិ ឃុំរបស់ខ្លួនមានការអភិវឌ្ឍ ហើយចំពោះបញ្ហាសំណូមពរដែលបានលើកឡើងនាពេលនេះ មួយចំនួនក្រុមការងារបានធ្វើការដោះស្រាយ ហើយមួយចំនួនទៀតដាក់ជូនថ្នាក់ដឹកនាំដើម្បីពិនិត្យ និងពិភាក្សារកដំណោះស្រាយជូនបងប្អូនប្រជាពលរដ្ឋបន្ដទៀត ។
ឯកឧត្តមប្រធានក្រុមប្រឹក្សាខេត្ត ក៏បានជម្រុញឲ្យអាជ្ញាធរគ្រប់លំដាប់ថ្នាក់ ជាពិសេសអាជ្ញាធរឃុំ មុននឹងឯកភាពសម្រេចតាមសំណើរបស់ប្រជាពលរដ្ឋ ត្រូវពិនិត្យផ្ទៀងផ្ទាត់ឲ្យបានច្បាស់លាស់ ជៀសវាងសម្រេចសំណើទៅបង្កផលលំបាកដល់ពួកគាត់នៅពេលអនាគត ។
គូសបញ្ជាក់ថា សំណួរ សំណូមពរដែលបានលើកឡើងនៅក្នុងវេទិកានោះ គឺមាន–បញ្ហាទំនាស់ព្រំដីរវាងប្រជាពលរដ្ឋ និងប្រជាពលរដ្ឋ. –បញ្ហាទំនាស់ដីរវាងប្រជាពលរដ្ឋ និងក្រុមហ៊ុន. បញ្ហាអ្នកសារព៍ត៌មានអាណាធិបតេយ្យ និងកុងត្រូលជជុះ ៕
