រដ្ឋលេខាធិការក្រសួងអប់រំ និងយកគំរូសាលាបៃតង ដែលបានអនុវត្តរួចនៅក្នុងខេត្តបន្ទាយមានជ័យ យកទៅធ្វេីការផ្សព្វផ្សាយដល់សាលាដ៏ទៃទៀតនៅទូទាំងប្រទេស
ខេត្តបន្ទាយមានជ័យ ៖ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា រួមនឹងប្រតិភូអមដំណេីរ បានអញ្ជេីញជាអធិបតីភាព ក្នុងពិធីប្រកាសអនុវត្តគម្រោង សាលាបៃតង ក្រោមកិច្ចព្រមព្រៀងរវាងក្រសួង អប់រំ យុវជន និង កីឡា និងអង្គការ ការីតាសស្វីស។
ពិធីនេះធ្វេីឡេីងនៅព្រឹកថ្ងៃទី២៦ ខែកក្កដា នៅសាលប្រជុំធំ សាលាខេត្តបន្ទាយមានជ័យ ហេីយក៏មានការអញ្ជេីញចូលរួម ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អភិបាលរងខេត្ត លោក ម៉ាក ក្លកល័រ នាយកប្រចាំប្រទេស អង្គារការីតាសស្វីស ប្រធានមន្ទីរអប់រំ អភិបាលក្រុង-ស្រុក ប្រធានការិយាល័យក្រុង-ស្រុក លោកគ្រូ-អ្នកគ្រូបានចូលរួម។
លោក ម៉ាក ក្លកល័រ នាយកប្រចាំប្រទេស អង្គារការីតាសស្វីស បានថ្លែងនូវចំណាប់អារម្មណ៍ លោកពិតជាមានភាពរីករាយជាខ្លាំងចំពោះកិច្ចសហការយ៉ាងល្អប្រសេីរពីថ្នាក់ដឹកនាំខេត្ត ពិសេសក្រសួង និងមន្ទីរអប់រំ យុវជន និងកីឡាខេត្ត ក្នុងការអនុវត្តគម្រោងសាលាបៃតង នៅខេត្តបន្ទាយមានជ័យ ដេីម្បីចូលរួមលេីកកម្ពស់វិស័យអប់រំ ក៏ដូចជាលេីកកម្ពស់បរិស្ថានសាលារៀនឲ្យមានបរិស្ថានស្អាត និងមានភាពបែតង។
ឯកឧត្តម ស សុខា រដ្ឋលេខាធិការក្រសួងអប់រំ ក៏បានថ្លែងអំណរគុណចំពោះអង្គការ ការីតាសស្វីស ដែលបានជ្រេីសរេីសខេត្តបន្ទាយមានជ័យ និងចំណាយថវិកាអនុវត្តសាលាបៃតង ដោយជ្រេីសរេីសយក ចំនួន៤៥សាលារៀន ដេីម្បីអនុវត្តគម្រោងនេះ
ឯកឧត្តម រដ្ឋលេខាធិការ ក៏បានបញ្ជាក់ថា ៖ លោកនិងយកគំរូសាលាបៃតង ដែលបានអនុវត្តរួចនៅក្នុងខេត្តបន្ទាយមានជ័យ យកទៅធ្វេីការផ្សព្វផ្សាយដល់សាលាដ៏ទៃទៀតនៅទូទាំងប្រទេស ក្នុងការអនុវត្តសាលាបៃតង ដេីម្បីលេីកកម្ពស់សោភ័ណ្ឌភាពសាលារៀន ឲ្យមានភាពស្រស់ស្អាត ប្រកបទៅដោយផាសុខភាព និងការរៀបចំឲ្យមានជាសួនផ្កា បង្គន់អនាម័យ កន្លែងលាងសម្អាតដៃជាដេីម។
ជាមួយនឹងការអនុវត្តគម្រោងសាលាបៃតង ឯកឧត្តម ស សុខា ក៏បានសង្កត់ធ្ងន់ថា ៖ សូមគណគ្រប់គ្រងសាលាទាំងអស់ ដែលត្រូវអនុវត្តគម្រោងសាលាបៃតងនេះ សូមចូលរួមអនុវត្តកម្មវីធីនេះឲ្យបានល្អ និងសូមគ្រប់បណ្តាសាលាទាំងអស់ចូលរួមអនុវត្តនូវគម្រោងនេះ ដេីម្បីបង្កេីនសោភ័ណ្ឌភាពសាលាប្រកបទៅដោយផាសុខភាព និងមានភាពស្រស់ស្អាត៕