ឈេី៣០ដេីម និង១៦១កំណាត់ ត្រូវដកហូត និងបង្រ្កាបដោយក្រុមជំនាញប្រឆាំងបទល្មេីសសេដ្ឋកិច្ច និងប្រឆាំងភេរវកម្ម នៃស្នងការនគរបាលខេត្តកំពង់ស្ពឺ
ខេត្តកំពង់ស្ពឺ ÷ កាលពីថៃ្ង១០ ខែកក្កដា ឆ្នាំ២០២០ កម្លាំងនគរបាលប្រឆាំងបទល្មេីសសេដ្ឋកិច្ច សហការជាមួយកម្លាំងជំនាញពាក់ព័ន្ធ ដឹកនាំដោយ ឯឧត្តម សុខ ភា អភិបាលរងខេត្ត និងបានការសម្របសម្រួលពីលោក វ៉ិត មឃៈ ព្រះរាជអាជ្ញារង ក្នុងនាមជាតំណាងលោកស្រី ចាតសូ រស្មី ព្រះរាជអាជ្ញា នៃអយ្យការអមសាលាដំបូងខេត្តកំពង់ស្ពឺ បានចុះឆែកឆេរទីតាំងលាក់លួចទុកឈេីខុសច្បាប់ ០១កន្លែង “សន្និធិឈើខុសច្បាប់” នៅចំណុចដីចំការភូមិដំបងវេញ ឃុំសង្កែសាទប ស្រុកឱរ៉ាល់ ជារបស់ឈ្មួញឈេីដុះស្លែម្នាក់ឈ្មោះ ជឿង ថេង ភេទប្រុស អាយុ៤២ឆ្នាំ នៅភូមិផ្សារកន្ទួត ឃុំសង្កែសាទប ស្រុកឱរ៉ាល់ ធ្លាប់ជាប់ពាក់ព័ន្ធក្នុងការដឹកជញ្ជូនអនុផលព្រៃឈេី បំផ្លាញស្ពាននៅខេត្ដកំពត និងធ្លាប់ជាប់ពន្ធនាគារកន្លងមក (បច្ចុប្បន្នគេចខ្លួន)។
ជាលទ្ធផល រកឃើញឈើប្រភេទឈ្លិកចំនួន៣០ដើម បង្កប់ដាក់ក្នុងស្រះទឹក បច្ចុប្បន្នជំនាញបានកំពុងកសាងសំណុំរឿង ដើម្បីបន្តនីតិវិធី។ កិច្ចប្រតិបត្ដិការជំនាញបន្ដស៊េីបអង្កេតរហូតដល់ថ្ងៃ ១៣ ខែកក្កដា ឆ្នាំ២០២០ នៅចំណុចក្រៅពីដីចំការឈ្មោះ ជឿង ថេង នៅក្នុងដីចំការមួយកន្លែងទៀត ចំការស្វាយចន្ទី ចំងាយប្រមាណ ០១គីឡូម៉ែត្រ ស្ថិតក្នុងភូមិភូមិដំបងវេញ ឃុំសង្កែសាទប ស្រុកឱរ៉ាល់ កម្លាំងសមត្ថកិច្ចប្រឆាំងបទល្មេីសសេដ្ឋកិច្ច កម្លាំង នគរបាលប្រឆាំងភេរវកម្ម និងឧក្រឹដ្ឋកម្មឆ្លងដែន ខេត្ដកំពង់ស្ពឺ អធិការដ្ឋាននគរបាលស្រុកឱរ៉ាល់ បានបង្រ្កាបនៅទីតាំងជាក់ស្ដែង។ ជាលទ្ធផល រកឃើញឈើជ្រុងប្រភេទឈ្លិកចំនួន ១៦១កំណាត់ ឃាត់រថយន្ដដឹកកុងទែនឺរ ២០ហ្វីត មួយគ្រឿង រថយន្តតូច ០២ គ្រឿង អេស្កាវ៉ាទ័ មួយគ្រឿងសម្រាប់លេីកបញ្ចូលឈេីក្នុងទូរកុងទែនឺរ និងម៉ូតូ មួយគ្រឿង។
បច្ចុប្បន្នវត្ថតាងទាំងអស់បានប្រគល់ជូនខាងជំនាញបរិស្ថានដែនជម្រកសត្វព្រៃភ្នំឱរ៉ាល់ ចាត់ការនីតិវិធីបន្ដ៕