ករណីអគ្គីភ័យឆេះផ្ទះអស់ចំនួន០៦ខ្នង នៅស្រុកមង្គលបូរី សមត្ថកិច្ចសង្ស័យមានមនុស្សលួចដុត
បន្ទាយមានជ័យ ៖ ក្នុងហេតុការណ៍អគ្គីភ័យបង្កឲ្យមានការភ្ញាក់ផ្អើលទាំងយប់នោះ សមត្ថកិច្ច អាជ្ញាធរ និងប្រជាពលរដ្ឋបានដាក់ការសង្ស័យមានមនុស្សលួចដុត ។ករណីអគ្គីភ័យនេះ បានកើតឡើងនៅវេលាម៉ោង១១និង៤០នាទីយប់ ថ្ងៃទី២០ ខែមិថុនា ឆ្នាំ២០២០ នៅភូមិសំរោង ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ ។
នៅក្នុងហេតុការណ៍ចុះជួយអន្តរាគមន៍ជួយពន្លត់អគ្គីភ័យនោះដែរគេសង្កេតឃើញមាន អាជ្ញាធរ ប្រជាពលរដ្ឋ និងកងកម្លាំងយោធា កងរាជអាវុធហត្ថ កងកម្លាំងនគរបាល ជួយអន្តរាគមន៍ពន្លត់ និងរថយន្តពន្លត់អគ្គីភ័យចំនួន០៦គ្រឿង ក្នុងនោះ របស់ស្នងការដ្ឋាននគរបាលខេត្តចំនួន០២គ្រឿង រថយន្តពន្លត់អគ្គីភ័យរបស់អធិការដ្ឋាននគរបាលស្រុកមង្គលបូរី០១គ្រឿង រថយន្តពន្លត់អគ្គីភ័យអធិការដ្ឋាននគរបាល ស្រុកព្រះនេត្រព្រះ ០១គ្រឿង រថយន្តពន្លត់អគ្គីភ័យ អធិការដ្ឋាននគរបាលស្រុកអូរជ្រៅ ០១គ្រឿង និងក្រុងសិរីសោភ័ណ ០១គ្រឿង ដឹកនាំបញ្ជាផ្ទាល់ដោយលោកឧត្តសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដោយបាញ់ទឹកអស់ចំនួន១៤រថយន្ត ទើបគ្រប់គ្រងស្ថានការណ៍បាន និងឈានដល់រលត់ទាំងស្រុងប្រើប្រាស់រយៈពេលជាង២ម៉ោង ភ្លើងមិនបានរាលដាលដល់លំនៅដ្ឋានជាច្រើនរយខ្នងក្បែរនោះឡើយ ។
ជនរងគ្រោះទាំង០៦គ្រួសារ ដែលត្រូវបានអគ្គីភ័យឆេះផ្ទះទាំងស្រុងនោះ តាមការឲ្យដឹងពីលោកវរសេនីយ៍ឯក ប៊ុន ផេង ស្នងការរង ទទួលការងារគ្រប់គ្រងអាវុធជាតិផ្ទុះ និងអគ្គីភ័យ បានឲ្យដឹងថា៖ ១/-ឈ្មោះ ឈួន ម៉ៅ ភេទប្រុស អាយុ ៥៤ឆ្នាំ ជាជនពិការ,២/-ឈ្មោះ សាំង រួម ភេទប្រុស អាយុ៥៣ឆ្នាំ មុខរបរ អ្នករត់ម៉ូតូឌុប ,៣/-ឈ្មោះ អឿ បូនី ភេទស្រី អាយុ៦៣ឆ្នាំ មុខរបរមេផ្ទះ ,៤/-ឈ្មោះ វ៉ាន់ សាន់ ភេទប្រុស អាយុ៥៤ឆ្នាំ មុខរបរជាកម្មករសំណង់,៥/-ឈ្មោះ មួង ផេងហួ ភេទប្រុស អាយុ ៥៥ឆ្នាំ មុខរបរចុងភៅការ ,៦/- ឈ្មោះ មួង សេងគី ភេទប្រុស អាយុ៦៣ឆ្នាំ មុខរបរចុងភៅការ ។ចំពោះទ្រព្យសម្បត្តិដែលរងនូវការខូចខាតសរុបទាំង០៦ផ្ទះនោះ តាមការប៉ាន់ប្រមាណជាជំហានដំបូងមិនតិចជាង៤០ម៉ឺនដុល្លានោះឡើយ ។
លោកស្នងការង បានបញ្ជាក់ថា៖តាមការស្រាវជ្រាវករណីភ្លើងឆេះនេះគឺដំបូងចេញពីផ្ទះរបស់ឈ្មោះ ឈួន ម៉ៅ នៅជាន់ខាងលើ រួចហើយបានរាលដាលដល់ផ្ទះ ចំនួន០៥ខ្នងបន្ថែមទៀត ។បើតាមស្រាវជ្រាវជុំវិញករណីអគ្គីភ័យឆេះផ្ទះនេះ ប្រជាពលរដ្ឋនៅជិតខាងនោះ ក៏ដូចជាសមត្ថកិច្ច និងអាជ្ញាធរ មានការសង្ស័យ ទៅលើកូនប្រសាររបស់ឈ្មោះ ឈួន ម៉ៅ ដែលមានឈ្មោះ ឈៀន សុឃីត ២៤ឆ្នាំ ជាមនុស្សញៀនថ្នាំ ជាអ្នកដុត ព្រោះមុនពេលកើតមានអគ្គីភ័យនេះ នៅវេលាម៉ោង៧យប់ ឈ្មោះ ឈៀន សុឃីត និងប្រពន្ធរបស់គេឈ្មោះ វឿន និមល់ អាយុ២១ឆ្នាំ បានឈ្លោះប្រកែកគ្នា រួចឈ្មោះ ឈៀន សុឃីត ២៤ ឆ្នាំ បានចេញពីផ្ទះបាត់លុះ ដល់វេលាម៉ោង១១និង៤០នាទីយប់ក៏ មានហេតុការណ៍ឆេះផ្ទះរបស់ឈ្មោះ ឈួន ម៉ៅ នេះមុនគេតែម្តងហើយបានរាលដាលដល់ផ្ទះចំនួន០៥ខ្នងទៀត ។
លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរី បានឲ្យដឹងថា៖ក្រោយពីមានបទបញ្ជាពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត កម្លាំងអធិការដ្ឋាននគរបាលស្រុកមង្គលបូរី បានធ្វើការស្រាវជ្រាវ និងនាំខ្លួនឈ្មោះ ឈៀន សុឃីត អាយុ២៤ ឆ្នាំ មកសាកសួរចម្លើយនៅអធិការដ្ឋាននគរបាលស្រុក តែឈ្មោះ ឈៀន សុឃីត បាននិយាយថាខ្លួនមិនបានដុតផ្ទះរបស់ខ្លួននោះទេ ក្រោយពីឈ្លោះប្រកែកគ្នាជាមួយប្រពន្ធ រួចហើយគេក៏ចេញពីផ្ទះ តាំងពីម៉ោង៨យប់។
លោកអធិការបានបញ្ជាក់ថា៖ទាក់ទងនឹងករណីភ្លើងឆេះផ្ទះនេះ សមត្ថកិច្ចនៅមិនទាន់សន្និដ្ឋានថាបណ្តាលមកពីករណីមានមនុស្សលួចដុតឬក៏បណ្តាលមកពីទុស្សេខ្សែភ្លើងនោះឡើយ ព្រោះភ្លើងឆេះចេញដំបូងពីផ្ទះរបស់ឈ្មោះឈួន ម៉ៅ នោះគឺនៅជាន់លើ ដែលគ្មានមនុស្សដេក ហើយជំនាញពិនិត្យគុបភ្លើងមិនមានដាច់ខ្សែលួស ដូច្នេះករណីនេះ ស្ថិតក្នុងការ ស្រាវជ្រាវនៅឡើយ ៕
