ឯកឧត្តមស្រ៊ន សំឫទ្ធី អភិបាលរងខេត្តកំពង់ឆ្នាំង ដឹកនាំកិច្ចប្រជុំពិភាក្សាការងារស្ដីពីការដាក់ឲ្យដំណើការសាកល្បងកម្មវិធីព័ត៌មានវិទ្យាសម្រាប់ការគ្រប់គ្រង និងផ្ដល់សេវានៅក្នុងអង្គភាពច្រកចេញចូលតែមួយខេត្តកំពង់ឆ្នាំង
ខេត្តកំពង់ឆ្នាំង ៖ រសៀលថ្ងៃចន្ទ ១០រោច ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៥ ខែមិថុនា ឆ្នាំ ២០២០ ឯកឧត្តមស្រ៊ន សំឫទ្ធី អភិបាលរងខេត្តកំពង់ឆ្នាំង បានដឹកនាំកិច្ចប្រជុំពិភាក្សាការងារស្ដីពីការដាក់ឲ្យដំណើរការសាកល្បងកម្មវិធីព័ត៌មានវិទ្យាសម្រាប់ការគ្រប់គ្រង និងផ្ដល់សេវានៅក្នុងអង្គភាពច្រកចេញចូលតែមួយខេត្ត នៅការិយាល័យរបស់ឯកឧត្តមផ្ទាល់។
ក្នុងកិច្ចពិភាក្សានោះដែរ ក៏មានការអញ្ជើញចូលរួមពីលោកអ៊ុក កីឡាប្រធានការិយាល័យប្រជាពលរដ្ឋខេត្តកំពង់ឆ្នាំង លោកលៀង ជុំសុបិន្ត នាយករងរដ្ឋបាលសាលាខេត្ត លោកលី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លោកគង្គ ឃាង អនុប្រធានមន្ទីរសាធារណការ និងដឹកជញ្ជូនខេត្ត លោកប្រធាន និងអនុប្រធានអង្គភាពច្រកចេញចូលតែមួយ។
គោលបំណងនៃកិច្ចប្រជុំ គឺដើម្បីផ្សព្វផ្សាយពីកិច្ចដំណើរការសាកល្បងកម្មវិធីព័ត៌មានវិទ្យាសម្រាប់គ្រប់គ្រង និងផ្ដល់សេវានៅក្នុងអង្គភាពច្រកចេញចូលតែមួយ ដោយក្នុងនោះខេត្តកំពង់ឆ្នាំង ត្រូវបានក្រសួងមហាផ្ទៃជ្រើសរើសឲ្យដាក់ដំណើរការសាកល្បង ក្នុងចំណោមរាជធានីខេត្តចំនួន ៩។
កិច្ចប្រជុំក៏បានពិភាក្សាផងដែរអំពីការបន្តជំរុញអនុវត្តការងារផ្ដល់សេវាជូនប្រជាពលរដ្ឋ នៅអង្គភាពច្រកចេញចូលតែមួយខេត្ត ឲ្យកាន់តែមានប្រសិទ្ធភាព លឿនរហ័ស ឆ្លើយតបតាមតម្រូវការរបស់អ្នកមកទទួលសេវា ៕
