ឯកឧត្តមស្រ៊ន សំឫទ្ធី អភិបាលរងខេត្ត ដឹកនាំកិច្ចប្រជុំពិភាក្សាការងារស្ដីពីការដាក់ឲ្យដំណើការសាកល្បងកម្មវិធីព័ត៌មានវិទ្យាសម្រាប់ការគ្រប់គ្រង និងផ្ដល់សេវានៅក្នុងអង្គភាពច្រកចេញចូលតែមួយខេត្តកំពង់ឆ្នាំង
ខេត្តកំពង់ឆ្នាំង ៖ នៅរសៀលថ្ងៃចន្ទ ១០រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ១៥ ខែមិថុនា ឆ្នាំ ២០២០ ឯកឧត្តមស្រ៊ន សំឫទ្ធី អភិបាលរងខេត្តកំពង់ឆ្នាំង បានដឹកនាំកិច្ចប្រជុំពិភាក្សាការងារស្ដីពីការដាក់ឲ្យដំណើរការសាកល្បងកម្មវិធីព័ត៌មានវិទ្យាសម្រាប់ការគ្រប់គ្រង និងផ្ដល់សេវានៅក្នុងអង្គភាពច្រកចេញចូលតែមួយរាជធានីនៅការិយាល័យរបស់ឯកឧត្តមផ្ទាល់។
ក្នុងកិច្ចប្រជុំពិភាក្សានោះដែរ ក៏មានការអញ្ជើញចូលរួមពីលោក អ៊ុក កីឡា ប្រធានការិយាល័យប្រជាពលរដ្ឋខេត្តកំពង់ឆ្នាំង លោកលៀង ជុំសុបិន្ត នាយករងរដ្ឋបាលសាលាខេត្ត លោកលី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លោកគង្គ ឃាង អនុប្រធានមន្ទីរសាធារណការ និងដឹកជញ្ជូនខេត្ត លោកឈាង បូរ៉ា ប្រធានអង្គភាពច្រកចេញចូលតែមួយ និងលោកប៊ុន សម្បត្តិ! អនុប្រធានអង្គភាពច្រកចេញចូលតែមួយ។
ជាកិច្ចចាប់ផ្ដើម លោកឈាង បូរ៉ា ប្រធានអង្គភាពច្រកចេញចូលតែមួយ បានរាយការណ៍ដោយសង្ខេបអំពីវត្ថុបំណង ក្នុងកិច្ចដំណើរការសាកល្បងកម្មវិធីព័ត៌មានវិទ្យាសម្រាប់គ្រប់គ្រង និងផ្ដល់សេវានៅក្នុងអង្គភាពច្រកចេញចូលតែមួយ មាន៩ខេត្ត ដោយក្នុងនោះខេត្តកំពង់ឆ្នាំង ក៏ត្រូវបានជ្រើសរើសឲ្យដាក់ដំណើរការសាកល្បងដែរ។
ក្នុងឪកាសនោះ បន្ទាប់ពីការពិភាក្សានិងផ្ដល់យោបល់រួចមក ឯកឧត្តមស្រ៊ន សំឫទ្ធី ប្រធានអង្គប្រជុំ បានសំណូមពរឲ្យមន្ទីរអង្គភាពដែលជាស្ថាប័នមានសមត្ថកិច្ច សូមអនុវត្តការងារដោយមានភាពបត់បែន និងអត់ធ្មត់រង់ចាំសេចក្ដីណែនាំបន្ថែមពីរាជរដ្ឋាភិបាលពីនីតិវិធីក្នុងការអនុវត្តដំណើរការកម្មវិធីព័ត៌មានវិទ្យានេះ។
បន្ថែមពីនោះឯកឧត្តម ក៏បានជម្រុញឲ្យអង្គភាពច្រកចេញចូលតែមួយអនុវត្តការដាក់ធាតុចូលក្នុងកម្មវិធីព័ត៌មានវិទ្យាឲ្យមានប្រសិទ្ធភាព ដោយឡែកចំពោះប្រភេទសេវាដែលលក្ខណ:សាំញ៉ាំ គឺត្រូវធ្វើរបាយការណ៍ ដើម្បីដាក់ជូនថ្នាក់ដឹកនាំពិនិត្យ និងពិភាក្សារកដំណោះស្រាយបន្ដទៀត ៕