ឃាត់ខ្លួនយុវជនម្នាក់ ពីបទចោរកម្ម
ខេត្តបាត់ដំបង៖ នៅព្រឹកថ្ងៃចន្ទ ១០កេីត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៥ ខែមិថុនា ឆ្នាំ២០២០ វេលាម៉ោង ៩និង០០នាទី អនុវត្តតាមមតិដឹកនាំរបស់ លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ព្រមទាំងអនុវត្តតាមការណែនាំជំនាញពីលោកវរសេនីយ៍ទោ លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ នៅចំណុចប៉ុស្តិ៍នគរបាលរដ្ឋបាលតាម៉ឺន កម្លាំងជំនាញនៃអធិការដ្ឋាននគរបាលស្រុកថ្មគោល ដែលមានលោកវរសេនីយ៍ឯក ផង់ សុភាព ជាអធិការនគរបាលស្រុក ចូលរួមជាមួយកម្លាំងប៉ុស្តិ៍នគរបាលរដ្ឋបាលតាមុឺន អនុវត្តដីកាបង្គាប់ឲ្យនាំខ្លួនលេខ ៤១៦ ចុះថ្ងៃទី០១ ខែមិថុនា ឆ្នាំ២០២០ របស់ចៅក្រមស៊ើបសួរ រ័ត្ន សុីថា នៃសាលាដំបូងខេត្តបាត់ដំបង ក្នុងនោះបាននាំខ្លួនឈ្មោះ សល់ ជីវិន ភេទប្រុស អាយុ ២៦ឆ្នាំ មានទីលំនៅបច្ចុប្បន្នផ្ទះលេខ ០៥ ក្រុមទី០១ ភូមិទំនាបឃុំតាម៉ឺន ស្រុកថ្មគោល ខេត្តបាត់ដំបង ដែលត្រូវបានចោទប្រកាន់ពីបទ (លួច) ប្រព្រឹត្តនៅក្រុមទី ០៣ ភូមិអង់ជើង ឃុំតាម៉ឺន ស្រុកថ្មគោល ខេត្តបាត់ដំបង កាលពីថ្ងៃទី ០១ ខែកក្កដា ឆ្នាំ ២០១៩។
ក្រោយពេលអនុវត្តនគរបាលស្រុកបានបញ្ជូនជនត្រូវចោទរូបនេះមកការិយាល័យជំនាញដើម្បីចាត់ការបន្តទៅសាលាដំបូងខេត្តបាត់ដំបង៕
