កងកម្លាំងនគរបាលប្រឆាំងបទល្មេីសសេដ្ឋកិច្ចខេត្ត ចុះផ្សព្វផ្សាយនិងសហការស្រាវជ្រាវរកស្រាថ្នាំចិនសែ ម៉ាក “តាំងគួយ”នៅតាមដេប៉ូចែកចាយ ទីផ្សារទូទាំងខេត្ដកំពង់ស្ពឺ
ខេត្តកំពង់ស្ពឺ ៖ ថ្ងៃសៅរ៍ ៨រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៣ ខែមិថុនា ឆ្នាំ២០២០ វេលាម៉ោង ១៤:៤៥ នាទី លោកឧត្ដមសេនីយ៍ទោ សម សាមួន ស្នងការនគរបាលខេត្ដ បញ្ជាឲ្យ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច ដឹកនាំដោយលោកវរសេនីយ៍ឯក ហេង សំរេច នាយការិយាល័យនគរបាលប្រឆាំងបទល្មើសសេដ្ឋកិច្ច ចុះត្រួតពិនិត្យស្រាវជ្រាវរកស្រាថ្នាំចិនសែ ដែលមាន ម៉ាក «តាំងគួយ»នៅតាមដេប៉ូចែកចាយ ទីផ្សារទូទាំងខេត្ដកំពង់ស្ពឺ ។
យោងតាមការប្រកាសក្រសួងសុខាភិបាលក្រោយហេតុការណ៍ស្លាប់មនុស្សនៅខេត្ដបន្ទាយមានជ័យ ដែលបង្កឡេីងដោយស្រាថ្នាំចិនសែម៉ាកតាំងគួយជាប្រភេទស្រាថ្នាំដែល មានសារធាតុផ្សំ មេតាណុលកម្រិតខ្ពស់ ដែលធ្វើអោយមានផលប៉ះពាល់ខ្លាំងដល់សុខភាពអ្នកហូប និងឈានទៅដល់ការបាត់បង់អាយុជីវិត។
ជាក់ស្ដែង ៖ នៅស្រុកម៉ាឡៃ និងក្រុងប៉ោយប៉ែត ខេត្តបន្ទាយមានជ័យ មានមនុស្សដែលហូបស្រាថ្នាំចិនសែ «តាំងគួយ» រួចបណ្ដាលឲ្យស្លាប់មានចំនួន ៧នាក់ និងមានមនុស្សមួយចំនួនទៀតកំពុងតែសង្រ្គោះបន្ទាន់ ។ក្រោយលទ្ធផលនៃការរកឃេីញនូវសារធាតុផ្សំផលិតស្រាថ្នាំចិនសែ តាំងគួយ នេះទេីបក្រសួងបានប្រកាសអោយគ្រប់ទីកន្លែងដេប៉ូចែកចាយលក់ស្រាម៉ាក តាំងគួយ ទាំងអស់បញ្ឍប់ការលក់អោយអតិថិជននិងត្រូវសហការជាមួយសមត្ថកិច្ចជំនាញ ប្រគល់ស្រាទាំងនោះយកមករក្សាទុកដេីម្បីត្រួតពិនិត្យ ក្នុងករណីម្ចាស់ដេប៉ូ ចែកចាយទាំងនោះនៅតែបន្ដលក់ស្រាថ្នាំនេះអោយទៅអ្នកទិញ គឺអាចនិងមានចំណាត់ការផ្លូវច្បាប់ ។
បច្ចុប្បន្ននៅទូទាំងខេត្ដកំពង់ស្ពឺ កំលាំងនគរបាល និងអាជ្ញាធរបានបន្ដចុះសហការផ្សព្វផ្សាយស្រាវជ្រាវបន្ដទៀត ៕