គ្រោះថ្នាក់ចរាចរណ៍ម៉ូតូ និងរថយន្ត បណ្ដាលអោយបុរសម្នាក់រងរបួសធ្ងន់
ព្រៃវែង ៖ ថ្ងៃទី២០ ខែឧសភា ឆ្នាំ២០២០ វេលាម៉ោង ៦និង៣០នាទី ត្រង់ចំណុចចន្លោះគីឡូម៉ែត្រ៦៤-៦៥ លើផ្លូវជាតិលេខ៨ ស្ថិតនៅភូមិទ្រា ឃុំកញ្ចំ ស្រុកពារាំងខេត្តព្រៃវែង។
តាមប្រភពព័ត៌មានបានអោយដឹងថា រថយន្តមួយគ្រឿងម៉ាកអេស៊ា ពណ៌ស ពាក់ស្លាកលេខ ភ្នំពេញ 3A 8234 បើកបរដោយឈ្មោះ យូ បុល ភេទប្រុស អាយុ ៤៣ឆ្នាំ រស់នៅភូមិត្រពាំងសេះ ឃុំអង់រមាស ស្រុកឈូក ខេត្តកំពត ដែលបើកបរលើផ្លូវក្រាលកៅស៊ូពីជើងទៅត្បូង រួចបត់ឆ្វេងឡើងលើផ្លូវជាតិលេខ ៨ លុះមកដល់ចំណុចកើតហេតុខាងលើ ក៏ត្រូវបាន ម៉ូតូមួយគ្រឿងម៉ាក Honda cbr ពណ៍ក្រហម ពាក់ស្លាកលេខ ភ្នំពេញ 1HU 8858 បើកបរដោយឈ្មោះ សុន សុជាតិ ភេទប្រុស អាយុ ៣២ឆ្នាំ រស់នៅភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង ដែលកំពុងបើកបរលើផ្លូវជាតិលេខ ៨ ក្នុងទិសដៅពីកើតទៅលិច ក៏បានជ្រុលទៅបុកចំចំហៀងផ្នែកខាងឆ្វេងរថយន្តខាងលើនោះតែម្ដង។
ក្នុងករណីនេះបណ្ដាលឲ្យអ្នកបើកបរម៉ូតូរងរបួសធ្ងន់ចំណែកម៉ូតូរងការខូចខាតធ្ងន់ រីឯរថយន្តរងការខូចខាតស្រាល។
ក្រោយពេលកើតហេតុសមត្ថកិច្ចបានទៅដល់ធ្វើការត្រួតពិនិត្យ និងវាស់វែងកន្លែងកើតហេតុ ចំណែកម៉ូតូនិងរថយន្តរួមទាំងអ្នកបើកបររថយន្តសមត្ថកិច្ចបានយកមកធ្វើការសាកសួរនៅអធិការដ្ឋាននគរបាលស្រុកពារាំងដើម្បីកសាងនីតិវិធីតាមផ្លូវច្បាប់៕
