គណៈប្រតិភូរដ្ឋបាលខេត្តព្រះវិហារ អញ្ចេីញចុះសួរសុខទុក្ខដល់កងកម្លាំង និងក្រុមគ្រូពេទ្យ ព្រមទាំងចុះត្រួតពិនិត្យទីតាំងសុវត្ថិភាពត្រៀមសម្រាប់ប្រជាពលរដ្ឋ
ខេត្តព្រះវិហារ៖ នាថ្ងៃពុធ ៨រោច ខែចេត្រ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៥ ខែមេសា ឆ្នាំ២០២០ គណៈប្រតិភូរដ្ឋបាលខេត្តព្រះវិហារ ដឹកនាំដោយ ឯកឧត្តម ប្រាក់ សុវណ្ណ អភិបាល នៃគណៈអភិបាលខេត្តព្រះវិហារ និង ឯកឧត្តម ឡុង សុវណ្ណ ប្រធានក្រុមប្រឹក្សាខេត្តព្រះវិហារ អមដំណើរដោយ លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្ត លោកឧត្ដមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្ត និងអង្គភាពមន្ទីរពាក់ព័ន្ធ បានអញ្ចេីញចុះសួរសុខទុក្ខដល់កងកម្លាំង និងក្រុមគ្រូពេទ្យ នៅតំបន់មុំបី, មន្ទីរពេទ្យបង្អែកស្រុកជាំក្សាន្ដ និងមណ្ឌលសុវត្ថិភាព តាកឹង ព្រមទាំងចុះត្រួតពិនិត្យទីតាំងសុវត្ថិភាពត្រៀមសម្រាប់ប្រជាពលរដ្ឋ ដែលទេីបវិលត្រលប់ពីក្រៅប្រទេស អោយនៅដោយឡែករយៈពេល ១៤ថ្ងៃ ក្នុងគោលបំណងបង្ការ និងទប់ស្កាត់ការរាតត្បាតនៃជំងឺកូវីដ-១៩។ ក្នុងឱកាសនោះដែរ ឯកឧត្ដម អភិបាលខេត្ត ក៏បានដាក់ចេញនូវវិធានការយ៉ាងម៉ឺងម៉ាត់ ដល់អាជ្ញាធរគ្រប់ជាន់ថ្នាក់ ពិសេសអាជ្ញាធរមូលដ្ឋាន ភូមិ-ឃុំ-សង្កាត់ ទាំងអស់ទូទាំងខេត្ត ត្រូវបន្តចុះស្រង់ស្ថិតិប្រជាពលរដ្ឋដែលទេីបត្រលប់មកពីក្រៅប្រទេស ត្រូវណែនាំឲ្យពួកគាត់អនុវត្តនូវគោលការណ៍ណែនាំរបស់ក្រសួងសុខាភិបាល ដោយតម្រូវឲ្យដាក់ខ្លួនឲ្យនៅដាច់ដោយឡែករយៈពេល១៤ថ្ងៃសិន ដេីម្បីធ្វេីការតាមដានសុខភាពដោយខ្លួនឯង ពិសេសបើសិនជាមានករណីមិនស្រួលខ្លួន ត្រូវស្ម័គ្រចិត្តមកពិនិត្យនៅមណ្ឌលសុខភាព ឬមន្ទីរពេទ្យបង្អែក រកវីរុស កូវីដ -១៩។ ទន្ទឹមនឹងនោះដែរ ឯកឧត្តម អភិបាលខេត្ត ក៏បានឧបត្ថម្ភថវិកា និងគ្រឿងឧបភោគ បរិភោគ និងអាកុល មួយចំនួនក្នុងន័យជួយរំលែកមួយចំណែករបស់មន្ទីរពេទ្យបង្អែកក៏ដូចជាការលើកទឹកចិត្តដល់កម្លាំងជួរមុខដូចគ្នា (ពេទ្យ និងកម្លាំងសមត្ថកិច្ច) ក្នុងការប្រយុទ្ធប្រឆាំងនូវការរីករាលដាល នៃមេរោគកូវីដ១៩នេះ៕
