អភិបាលខេត្តកំពង់ចាម ត្រៀមទីតាំង ៣កន្លែង ស្មើនឹង ៧៥៦គ្រែ សម្រាប់ទទួលព្យាបាលអ្នកផ្ទុកវីរុសកូវីដ ១៩
កំពង់ចាម ៖ អនុវត្តទៅតាមគោលការណ៍ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អគារចំនួន ៣កន្លែង មានបន្ទប់ ចំនួន ១៧៩ ស្មើនឹង ៧៥៦គ្រែ ត្រូវបានរដ្ឋបាលខេត្តកំពង់ចាម ត្រៀមរួចជាស្រេច ដើម្បីទទួលព្យាបាលអ្នកផ្ទុកវីរុសកូវីដ ១៩ ។ កាលពីថ្ងៃទី២៣ ខែមីនា ឆ្នាំ២០២០ ម្សិលមិញនេះ ឯកឧត្តម អ៊ុន ចាន់ដា អភិបាលខេត្ត និងជាប្រធានគណៈកម្មការប្រយុទ្ធជម្ងឺកូវីដ១៩ ខេត្តកំពង់ចាម បានដឹកនាំក្រុមការងារជំនាញ អញ្ជើញចុះពិនិត្យអគារសិក្សាថ្មី នៃសាលាគរុកោសល្យភូមិភាគកំពង់ចាម ដែលជាអំណោយរបស់សម្ដេចតេជោ ហ៊ុន សែន ដើម្បីត្រៀមរៀបចំទីតាំងដាច់ដោយឡែក សម្រាប់ទទួលពិនិត្យព្យាបាលអ្នកជម្ងឺកូវីដ ១៩ ព្រមទាំង រៀបចំតប្រព័ន្ធទឹកស្អាត និងបណ្តាញអគ្គិសនី ឲ្យបានល្អប្រសើរផងដែរ ។
សូមបញ្ជាក់ផងដែរថា ក្រោយពីទទួលបានគោលការណែនាំ ពីប្រមុខរាជរដ្ឋាភិបាលកម្ពុជា រដ្ឋបាលខេត្តកំពង់ចាម បានសម្រេចរៀបចំកន្លែង សម្រាប់ព្យាបាលអ្នកជម្ងឺ កូវីដ ១៩ ចំនួន ៣កន្លែង ក្នុងក្រុងកំពង់ចាម ក្នុងនោះរួមមាន ៖ ១-អគារមន្ទីរពេទ្យខេត្ត ចំនួន ២អគារ មាន១៤បន្ទប់ ស្មើចំនួន ៦២គ្រែ បច្ចុប្បន្នមានអ្នកជម្ងឺចំនួន ០៨នាក់ កំពុងសម្រាកព្យាបាល ។ ទី២-សណ្ឋាគារមេគង្គ មានចំនួន ៧១បន្ទប់ ស្មើចំនួន ១៤២គ្រែ ។ ៣-សាលាគរុកោសល្យភូមិភាគ មានអគារអន្តេវេសិកដ្ឋាន ចំនួន ១អគារ មានចំនួន ៤០បន្ទប់ ស្មើចំនួន ១២០គ្រែ ដែលបច្ចុប្បន្ន ក្រុមការងារកំពុងរៀបចំបំពាក់សម្ភារ បន្ទប់ទឹក ប្រព័ន្ធអគ្គីសនី ទឹកស្អាត និងគ្រែអ្នកជម្ងឺ ។ និងអគាររៀន ចំនួន ២អគារ ស្មើចំនួន ៥៤បន្ទប់ ស្មើចំនួន ៤៣២គ្រែ ក្រុមការងារនឹងរៀបចំសម្អាត និងបំពាក់សម្ភារបន្ថែម នៅពេលបញ្ចប់ការងារ រៀបចំអន្តេវេសិកដ្ឋានរួចរាល់ ។ សរុបទីតាំងដែលបានត្រៀមថ្មី និងអគារដែលបានដាក់អ្នកជម្ងឺកូវីដ ១៩ សម្រាកព្យាបាហើយនោះ មានចំនួន ០៣កន្លែង ស្មើនឹង ០៥អគារ និងមានបន្ទប់ចំនួន ១៧៩បន្ទប់ ស្មើចំនួន ៧៥៦គ្រែ ៕
