ឯកឧត្តម អ៊ុន ចាន់ដា អភិបាលខេត្តកំពង់ចាម អញ្ជើញសម្ពោធដាក់ឲ្យប្រើប្រាស់ជាផ្លូវការនូវផ្លូវបេតុង និងសមិទ្ធផលនានា នៅវត្តទួលច័ន្ទ
កំពង់ចាម ៖ សមិទ្ធផលជាច្រើន បម្រើដល់វិស័យពុទ្ធចក្រ និងវិស័យអាណាចក្រ មានការរីកចម្រើនជាបន្តបន្ទាប់ ក្រោមតំបូលសុខសន្តិភាព ។ នាព្រឹកថ្ងៃទី០២ ខែមីនា ឆ្នាំ២០២០ ឯកឧត្តម អ៊ុន ចាន់ដា អភិបាលខេត្ត នៃគណៈអភិបាលខេត្តកំពង់ចាម អញ្ជើញសម្ពោធដាក់ឲ្យប្រើប្រាស់ជាផ្លូវការនូវផ្លូវបេតុង ៥.០០០ម៉ែត្រ និងសមិទ្ធផលនានា នៅវត្តទួលច័ន្ទ ស្ថិតនៅឃុំស្វាយរក្ស ឃុំសូរសែន្យ ស្រុកព្រៃឈរ ។
ពិធីនេះក៏មានការអញ្ជើញចូលរួមពី ឯកឧត្ដមជាអភិបាលរងខេត្ត ថ្នាក់ដឹកនាំមន្ទីរ អង្គភាព ស្ថាប័ន ក្នុងខេត្ត និងអាជ្ញាធរមូលដ្ឋាន ព្រមទាំង ព្រះសង្ឃ តំណាងប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស យ៉ាងច្រើនកុះករផងដែរ។
ឯកឧត្ដម អ៊ុន ចាន់ដា មានប្រសាសន៍ ចាត់ទុកផ្លូវបេតុង ១ខ្សែ នេះថា គឺជាផ្លូវល្អ ស្អាត ប្រកបដោយគុណភាព ហើយជាសមិទ្ធផលប្រវត្តិសាស្ត្រថ្មីមួយទៀត នៅក្នុងមូលដ្ឋាន ហើយបានផ្ដល់ប្រយោជន៍យូរអង្វែង សម្រាប់បងប្អូនប្រជាពលរដ្ឋ នៅក្នុងតំបន់ និងក្រៅតំបន់ ទុកសម្រាប់ប្រើប្រាស់ផងដែរ។ ឯកឧត្ដមអភិបាលខេត្តកំពង់ចាម លើកឡើងថា វិស័យផ្លូវថ្នល់ គឺជាប៉ូលអាទិភាពមួយ ក្នុងចំណោមប៉ូលទាំង ៤ ដែលជាអាទមាន ៖ មនុស្ស ផ្លូវ ភ្លើង និងទឹក ។ យ៉ាងណាម៉ិញ ប្រមុខរាជរដ្ឋាភិបាល បានចាត់ទុកវិស័យផ្លូវថ្នល់ គឺជាវិស័យអាទិភាពមួយ ដែលនៅតែបន្តអនុវត្ត ដើម្បីធ្វើការអភិវឌ្ឍនៅតាមមូលដ្ឋានជានិច្ច ។ ជាមួយនឹងកិច្ចអភិវឌ្ឍនេះដែរ រាជរដ្ឋាភិបាលកម្ពុជា បានបើកទូទាយ ឲ្យមានការចូលចំណែកពីសប្បុរសជន និងអង្គការដៃគូអភិវឌ្ឍនានាផងដែរ។ ជាក់ស្ដែង សមិទ្ធផលដែលត្រូវសម្ពោធដាក់ឲ្យប្រើប្រាស់នាពេលនេះ គឺស្ថិតក្រោមការដឹកនាំកសាង ពីព្រះគ្រូចៅអធិការវត្ត ដែលបានចលនាបច្ច័យ ពីសំណាក់ប្រជាពលរដ្ឋ ពុទ្ធបរិស័ទគ្រប់ទិសទី ហើយត្រូវបានចំណាយថវិកាសន្ធឹកសន្ធាប់ ប្រមាណជិត ៣០ម៉ឺនដុល្លារអាមេរិកឯណោះ ។ ឯកឧត្ដម មានប្រសាសន៍ដែរថា សមិទ្ធផល ដែលបានកើតឡើងនាពេលនេះ គឺបានមកដោយសារកម្លាំងសាមគ្គីរវាងព្រះសង្ឃ និងសប្បុរសជននានា ប៉ុន្តែវាមិនមែនជាទ្រព្យសម្បត្តិរបស់វត្តនោះឡើយ ពោលវាគឺជាទ្រព្យសម្បត្តិរួមសម្រាប់បងប្អូនប្រជាពលរដ្ឋនៅក្នុងតំបន់ផ្ទាល់ និងក្រៅតំបន់ផងដែរ។ ដូច្នេះសូមឲ្យបងប្អូននៅទីនេះ ចូលរួមថែទាំផ្លូវនេះជាប្រចាំ ធ្វើយ៉ាងណាដើម្បីទុកប្រើប្រាស់បានយូរអង្វែង តកូន តចៅទៅថ្ងៃអនាគត ។
ស្ថិតក្នុងឱកាសនោះដែរ ឯកឧត្ដមអភិបាលខេត្ត ក៏បានសំណូមពរដល់បងប្អូនប្រជាពលរដ្ឋទាំងអស់ចូលរួមជាមួយអាជ្ញាធរ និងសមត្ថកិច្ចមូលដ្ឋាន អនុវត្តគោលនយោបាយ ភូមិ ឃុំ មានសុវត្ថិភាព ដើម្បីភាពសុខដុមរមនាក្នុងសហគមន៍ផងដែរ។ ទន្ទឹមនឹងនោះ ពេលនេះយើងទាំងអស់គ្នា បានទទួលបានផ្លូវល្អសម្រាប់ប្រើប្រាស់ហើយ ដូច្នេះសូមណែនាំដល់កូនចៅរបស់ខ្លួន ចូលរួមគោរពច្បាប់ចរាចរណ៍ នៅរាល់ពេលធ្វើដំណើរ ត្រូវពាក់មួក និងខ្សែក្រវ៉ាត់សុវត្ថិភាព ជានិច្ច ។ ជាមួយនោះ ក៏សូមអប់រំកូនចៅ ឲ្យជៀសចាកឆ្ងាយពីគ្រឿងញៀនគ្រប់ប្រភេទ ។ ដោយឡែកបច្ចុប្បន្ននេះ អាកាសធាតុក្ដៅហួតហែង សូមឲ្យបងប្អូនយកចិត្តទុកដាក់ខ្ពស់ អំពីសុខភាព និងប្រុងប្រយ័ត្នជានិច្ច អំពីបញ្ហាអគ្គិភ័យគ្រប់ប្រភេទ ដែលអាចបង្កគ្រោះអគ្គិភ័យផងដែរ៕
