សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ អញ្ជើញចុះពិនិត្យការដ្ឋានសាងសង់ផ្លូវទាំង៣៤ ខ្សែនៅក្នុងខេត្តព្រះសីហនុ
ខេត្តព្រះសីហនុ៖ ថ្ងៃសៅរ៍ ៩ រោច ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៨ ខែមករា ឆ្នាំ២០២០ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ អមដំណើរដោយឯកឧត្តមឧបនាយរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូប នីយកម្មនិងសំណង់ ឯកឧត្តម សាយ សំអាល់ រដ្ឋមន្ត្រីក្រសួង បរិស្ថាន ឯកឧត្តម គួច ចំរើន អភិបាល នៃគណ:អភិបាល ខេត្តព្រះសីហនុ និងមន្ត្រីពាក់ព័ន្ធជាច្រើនរូបទៀត អញ្ជើញពិនិត្យការដ្ឋានសាងសង់ផ្លូវទាំង៣៤ ខ្សែនៅក្នុងខេត្តព្រះសីហនុ ក្នុងនោះមានផ្លូវមួយចំនួនដែលកំពុងអនុវត្តដោយ កងវិស្វកម្មលេខ១៧៨ ស្ពានថ្នល់ ក្រសួងការពារជាតិផងដែរ។
ការសាងសង់ផ្លូវចំនួន៣៤ខ្សែ ដែលមាន ប្រវែងសរុប៨៤.៥០៥ម៉ែត្រ នៅក្នុងខេត្តព្រះសីហនុមកទល់នឹងពាក់កណ្តាលខែមករា ឆ្នាំ២០២០ សម្រេចលទ្ធផលបានប្រមាណជា៣០ភាគរយនៃគម្រោងហើយ បន្ទាប់ពីបើកការដ្ឋានជាផ្លូវការក្រោមអធិបតីភាពដ៏ខ្ពង់ខ្ពស់របស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី កាលពីថ្ងៃទី១៦ ខែវិច្ឆិកា ឆ្នាំ ២០១៩ រួចមកក្នុងនោះមានផ្លូវមួយចំនួន បាន និងកំពុងរៀបចំប្រព័ន្ធលូ និងចាប់ផ្តេីមចាក់ក្រាលបេតុងជាបណ្តេីរៗ ហេីយ។
ការដ្ឋានសាងសង់ផ្លូវទាំង៣៤ខ្សែ ដែលបានអនុវត្តដោយក្រុមហ៊ុនឯកជនចំនួន៦និងកងវិស្វកម្មចំនួនពីរគឺកងវិស្វកម្មសម្តេចតេជោហ៊ុនសែនសៀមរាប និងកងវិស្វកម្មលេខ១៧៨ ស្ពានថ្នល់នៃក្រសួងការពារជាតិ គិតពីថ្ងៃទី១៦ខែ វិច្ឆិកា ឆ្នាំ២០១៩ ដែលជាថ្ងៃបើកការដ្ឋានជាផ្លូវការមកដល់ត្រឹមថ្ងៃទី១៥ខែមករាឆ្នាំ២០២០នេះ គឺមានរយៈពេលពីរខែគត់៕
