នាយករងសាកលវិទ្យាល័យគ្រប់គ្រង និងសេដ្ឋកិច្ច(UME) សាខាខេត្តបន្ទាយមានជ័យស្លាប់ក្នុងគ្រោះថ្នាក់ចរាចរណ៍
ខេត្តបន្ទាយមានជ័យ ៖ លោកនាយករងសាកលវិទ្យាល័យគ្រប់គ្រង និងសេដ្ឋកិច្ច(UME) សាខាខេត្តបន្ទាយមានជ័យបានស្លាប់ភ្លាមៗក្នុងហេតុការណ៍គ្រោះថ្នាក់ចរាចរណ៍ កើតឡើងនៅវេលាម៉ោង ១០ និង១០នាទីយប់ ថ្ងៃទី១៥ ខែមករា ឆ្នាំ២០២០ នៅលើកំណាត់ផ្លូវជាតិលេខ៦ ត្រង់ចំណុចស្ពានទី៤ ក្រៅទីប្រជុំជនស្ថិតក្នុងភូមិកំព្រីង សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ទោ សួន នីប៉ូ នាយរងការិយាល័យនគរបាលចរាចរណ៍ផ្លូវគោកនៃស្នងការដ្ឋានខេត្តបន្ទាយមានជ័យ បានអោយដឹងនៅថ្ងៃទី១៦ ខែមករា ឆ្នាំ២០២០នេះថា ៖ ករណីគ្រោះថ្នាក់ចរាចរណ៍កើតឡើងរវាងរថយន្តម៉ាកតូយូតាកាម៉ារីបាឡែន ពាក់ស្លាកលេខ ភ្នំពេញ 2X-3613 បើកបរក្នុងទិសដៅពីទិសខាងកើតទៅខាងលិច បុកប៉ះរថយន្តធុនធំ មិនស្គាល់ម៉ាកពីក្រោយ ក្នុងទិសដៅស្របទិសគ្នា បណ្តាល អោយអ្នកបើកបរម្នាក់ភេទប្រុសបានស្លាប់បន្ទាប់ពីខ្ទាតចេញពីរថយន្ត ហើយរថយន្តខូចខាតធ្ងន់ធ្ងរ។ចំណែកឯរថយន្តធុនធំនោះមិនស្គាល់ភិន បានបើករត់គេចបាត់ តែសមត្ថកិច្ចនគរបាលបាននឹងកំពុងស្រាវជ្រាវស៊ើបអង្កេតបន្ត ។
នាយរងការិយាល័យនគរបាលចរាចរណ៍បន្តថា ៖ មូលហេតុនៃគ្រោះថ្នាក់នោះមកពីអ្នកបើកបររថយន្តតូចបើកបរល្បឿនលឿនខ្វះការប្រុងប្រយ័ត្ន ហើយសង្ស័យស្ថិតក្រោមឥទ្ធពលនៃគ្រឿងស្រវឹង ។
អ្នកស្រី ពែក សុភួង នាយិកាវិទ្យាល័យអូរអំបិល ក្រុងសិរីសោភ័ណអោយដឹងថា ៖ ជនរងគ្រោះនោះគឺស្វាមីរបស់អ្នកស្រី លោកសាស្ត្រាចារ្យ សំ សុខា អាយុ៥០ឆ្នាំ បង្រៀននៅវិទ្យាល័យជប់វារី ស្រុកព្រះនេត្រព្រះ និងធ្វើការក្រៅម៉ោងរដ្ឋជានាយករងសាកលវិទ្យាល័យគ្រប់គ្រង និងសេដ្ឋកិច្ច(UME) សាខាខេត្តបន្ទាយមានជ័យ។មុនពេលកើតហេតុស្វាមីរបស់គាត់បានមកបង្រៀននៅវិទ្យាល័យជប់វារី ហើយចូលរួមកម្មវិធីមិត្តភក្តិ លុះពេលយប់ក៏ត្រឡប់មកគេហដ្ឋានវិញ ហើយជួបគ្រោះថ្នាក់ដូច្នេះ ។ភរិយា បងប្អូន សាច់ញាតិមិត្ត មិត្តរួមអាជីព សិស្ស និស្សិត មន្ត្រីអប់រំ និងអាជ្ញាធរមានសមត្ថកិច្ចចាត់ទុកមរណភាពលោកសាស្ត្រាចារ្យសំ សុខា ជាបាត់បង់អ្នកជាតិស្រឡាញ់ និងធនធានមនុស្សដ៏ល្អប្រពៃម្នាក់ បច្ចុប្បន្នសពត្រូវបានរៀបចំធ្វើបុណ្យនៅគេហដ្ឋាន ស្ថិតក្នុងសង្កាត់អូរអំបិល ក្រុងសិរីសោភ័ណ ៕