ខេត្តព្រះសីហនុ អាជ្ញាធរបានប្រកាសបិទចរាចរណ៍ជាបណ្តោះអាសន្នសម្រាប់រថយន្តធុនធំ តែរថយន្តធុនតូចនៅឱ្យចរាចរណ៍ដោយការប្រុងប្រយត័្ន
ខេត្តព្រះសីហនុ ៖ នៅវេលាម៉ោង៣ល្ងាច ថ្ងៃទី០៤ ខែកញ្ញា ឆ្នាំ២០១៩នេះ ត្រង់ចំណុចស្ពានស្ទឹងសំរោង ចន្លោះគីឡូម៉ែត្រលេខ 115-116 ផ្លូវជាតិលេខ៤ ក្នុងភូមិសាស្ត្រ ឃុំអូរបាក់រទេះ ស្រុកកំពង់សីលា ខេត្តព្រះសីហនុ អាជ្ញាធរបានប្រកាសបិទចរាចរណ៍ជាបណ្តោះអាសន្នសម្រាប់រថយន្តធុនធំ តែរថយន្តធុនតូចនៅឱ្យចរាចរណ៍ដោយការប្រុងប្រយត័្ន ដោយសារជំនន់ទឹកភ្លៀង បន្តហក់ឡេីងខ្ពស់។
មន្ត្រីថ្លែងថា កម្ពស់ទឹកបានឡើងលិចស្ពានស្ទឹងសំរោង និងបានហូរកាត់ពីលើផ្លូវជាតិច្រើនរយម៉ែត្រ ដែលមិនអាចអោយរថយន្តធំ ធ្វើចរាចរណ៍ឆ្លងកាត់បានឡើយ ស្របពេលដែលធាតុអាកាស ភ្លៀងនៅតែបន្តធ្លាក់ ហើយប្រសិនបើទឹកនៅតែបន្តហក់ឡើង យប់នេះរថយន្តតូចៗក៍នឹងត្រូវផ្អាកដែរ។
ចំពោះមុខស្ថានភាពបែបនេះ គណបញ្ជាការឯកភាពរដ្ឋបាលស្រុកកំពង់សីលា បានដាក់បន្ថែមកម្លាំងប្រចាំការត្រួតពិនិត្យ រក្សាសុវត្ថិភាពទូទៅនិងសម្រួលការងារផ្សេងៗជូនពលរដ្ឋនិងអ្នក ដំណើរនៅចំណុចនោះ រហូតដល់ទឹកស្រកឡើងវិញ ៕
