រដ្ឋបាលខេត្តកំពង់ឆ្នាំង ទទួលបដិសណ្ឋារកិច្ចស្វាគមន៍ ចំពោះប្រតិភូគណៈកម្មការទី៨ នៃរដ្ឋសភា ដែលដឹកនាំដោយលោកជំទាវ ឡោក ខេង
ខេត្តកំពង់ឆ្នាំង ៖ នៅរសៀលថ្ងៃអង្គារ ១៣កើត ខែស្រាពណ៏ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៣ ខែសីហា ឆ្នាំ២០១៩ នៅសាលាខេត្តកំពង់ឆ្នាំងឯកឧត្តមអៀង វុធ អភិបាលខេត្តកំពង់ឆ្នាំង តំណាងបឯកឧត្តមឈួរ ច័ន្ទឌឿន អភិបាលខេត្តរួមជាមួយនឹងលោក លោកស្រី ជាប្រធានមន្ទីរជំនាញ បានទទួលបដិសណ្ឋារកិច្ចស្វាគមន៍យ៉ាងកក់ក្ដៅ ចំពោះប្រតិភូគណៈកម្មការទី៨ នៃរដ្ឋសភា ដែលដឹកនាំដោយលោកជំទាវ ឡោក ខេង ប្រធានគណៈកម្មការទី៨។
កិច្ចជំនួបពិភាក្សានេះ ដើម្បីស្វែងយល់ពីវឌ្ឍនភាព ក៏ដូចជាបញ្ហាប្រឈមរបស់ខេត្ត ជាពិសេសចឹងដឹងពីការអនុវត្តគោលនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលអាណត្តិទី៦ និងការផ្តល់នូវសេវាសាធារណៈជូនបងប្អូនប្រជាពលរដ្ឋ ដូចជាសេវាសង្គមកិច្ច សេវាសុខាភិបាល សេវាការងារ សេវាលើកកម្ពស់ការចូលរួមរបស់ស្ត្រី ជាពិសេសសេវាគាំពារសង្គម មូលនិធិសមធម៌ សេវាអ្នកប្រើប្រាស់ប័ណ្ណបេឡាជាតិរបបសន្តិសុខសង្គម ( ប ស ស ) ទាំងកម្មករ កម្មការិនី មន្ត្រីរាជការ និង មន្ត្រីចូលនិវត្តន៍ ៕