កិច្ចប្រជុំ សាមញ្ញលើកទី២ អាណត្តិទី៣ របស់ក្រុមប្រឹក្សាក្រុងសិរីសោភ័ណ
ខេត្តបន្ទាយមានជ័យ ៖ កិច្ចប្រជុំសាមញ្ញលើកទី២ អាណត្តិទី៣ របស់ក្រុមប្រឹក្សាក្រុងសិរីសោភ័ណ ក្រោមវត្តមាន លោក ជាម សុខ ប្រធានក្រុមប្រឹក្សាក្រុងសិរីសោភ័ណ លោក ហ៊ឹល រ៉ាយ៉ា អភិបាលនៃគណៈអភិបាលក្រុង ដែលមានការអញ្ជើញចូលរួមសមាជិកក្រុមប្រឹក្សាទាំង១៨រូប អភិបាលរងក្រុង សមត្ថកិច្ចពាក់ព័ន្ធ លោក លោកស្រី អាជ្ញាធរមូលដ្ឋាន បានចូលរួមដែលប្រព្រឹត្តទៅនៅសាលប្រជុំសាលាក្រុង នៅថ្ងៃទី៣០ ខែកក្កដា ឆ្នាំ២០១៩ ។ នៅក្នុងកិច្ចប្រជុំសមាជិកក្រុមប្រឹក្សាក្រុង បានស្នើរសុំកិច្ចអន្តរាគមន៍ពីថ្នាក់ដឹកនាំចុះពិនិត្យ ទីតាំងចិញ្ចឹមទា នៅចំណុចក្រោយផ្សារដើមគរ (ផ្សារអូរអំបិល) ស្ថិតនៅសង្កាត់អូរអំបិល ក្រុងសិរីសោភ័ណ ដែលវាបានបង្កនូវផលប៉ះពាល់ក្លិនស្អុយខ្លាំងពិបាកដល់ប្រជាពលរដ្ឋក្នុងការរស់នៅ។
មានប្រសាសន៍បើក និងបិទអង្គប្រជុំ លោក ជាម សុខ ប្រធានក្រុមប្រឹក្សាក្រុង ប្រធានអង្គប្រជុំ បានសម្តែងចំពោះគណៈអភិបាលក្រុង កងកម្លាំងគ្រប់ប្រភេទ ការិយាល័យនានាជុំវិញក្រុង និងក្រុមប្រឹក្សាសង្កាត់ទាំងអស់ ដែលកន្លងមកបានខិតខំប្រឹងប្រែងបំពេញតួនាទីភារកិច្ច ដោយស្មារតីទទួលខុសត្រូវខ្ពស់ ។ ជាមួយគ្នានោះ ប្រធានអង្គប្រជុំ ក៏បានជម្រុញណែនាំបន្ថែមដល់ គណៈអភិបាលក្រុង សមត្ថកិច្ច អាជ្ញាធរមូលដ្ឋាន ត្រូវធ្វើយ៉ាងខិតខំចុះមូលដ្ឋានឲ្យបានជាប្រចាំ ដើម្បីពិនិត្យតាមដានសភាពការណ៍នៅមូលដ្ឋានរបស់ខ្លួន ទាក់ទងបញ្ហាប្រឈមរបស់ប្រជាពលរដ្ឋ បទល្មើសផ្សេងៗ ដើម្បីយើងបានដោះស្រាយបានទាន់ពេលវេលា និងបន្តជម្រុញដល់ក្រុមការងារក្នុងការផ្តល់សេវាសាធារណៈផ្សេងៗ ជូនប្រជាពលរដ្ឋឲ្យបានទាន់ពេលវេលា ។
មានមតិចូលរួម លោក ហ៊ឹល រ៉ាយ៉ា អភិបាលនៃគណៈអភិបាលក្រុង ក៏បានធ្វើការជម្រុះដល់អាជ្ញាធរ សមត្ថកិច្ចពាក់ព័ន្ធ ត្រូវចូលរួមទប់ស្កាត់បទល្មើសផ្សេងៗឲ្យបាន ដែលតែងតែបង្កការភ័យខ្លាចចំពោះពលរដ្ឋ ដូចជា ៖ ក្មេងទំនើង ល្បែងស៊ីសង ពិសេសករណីជួញដូរ និងប្រើប្រាស់គ្រឿងញៀន ដែលសមត្ថកិច្ចត្រូវតែធ្វើការបង្ក្រាប់ឲ្យបានជាដាច់ខាត់ ។ និងត្រូវបន្តចុះអប់រំផ្សព្វផ្សាយណែនាំ ពីគោលនយោបាយភូមិ-ឃុំ មានសុវត្ថិភាពទាំងចំនុច៩ ដើម្បីឲ្យពួកគាត់មានកិច្ចសហការ រាយការណ៍មកជាមួយសមត្ថកិច្ច ដើម្បីធ្វើការបង្ក្រាបឲ្យបានទាន់ពេលវេលា ។ លោកអភិបាលក្រុង បានសង្កត់ធ្ងន់ថា ៖ មានមន្ត្រីមួយចំនួន បានទារប្រាក់ថ្លៃសេវាខាងក្រៅពីពលរដ្ឋ ក្នុងការរត់ឯកសារជូន ដើម្បីតែផលប្រយោជន៍ផ្ទាល់ខ្លួន ចំពោះសកម្មភាពនេះត្រូវតែបញ្ឈប់ជាបន្ទាន់ បើមិនដូច្នោះទេ លោកនឹងអនុវត្តអភិក្រមទាំង៥ របស់សម្តេចតេជោ ដើម្បីតម្លាភាពក្នុងការដឹកនាំ ជាប្រយោជន៍ដល់ប្រជាពលរដ្ឋ ៕