កិច្ចប្រជុំស្តីពីការជំរុញអនុវត្តន៍វិធានការបង្ការទប់ស្កាត់និងបង្ក្រាបអំពេីលួចឆក់ នៅស្នងការរដ្ឋាននគរបាលខេត្តសៀមរាប
សៀមរាប៖ លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្ត បានអញ្ជើញចូលរួមបើកកិច្ចប្រជុំផែនការបង្ការ និងទប់ស្កាត់បទល្មើស លួច ឆក់ ក្នុងខេត្តសៀមរាប នាព្រឹក ថ្ងៃច័ន្ទ ១៣រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៩ ខែកក្កដា ឆ្នាំ២០១៩ នៅសាលប្រជុំស្នងការរដ្ឋាននគរបាលខេត្តសៀមរាប។
នាក្នុងឱកាសនោះដែរក៏មានការចូលរួមពីលោកឧត្តមសេនីយ៍ទោ ប៉ុល រតនា អនុប្រធាននាយកដ្ឋានព្រហ្មទណ្ឌ និងលោកឧត្តមសេនីយ៍ទោ នឹម ច័ន្ទដាណា អនុប្រធាននាយកដ្ឋានព្រហ្មទណ្ឌ ព្រមទាំងស្នងការរងទទួលផែនការងារព្រហ្មទណ្ឌ លោកនាយ-នាយរងការិយាល័យពាក់ព័ន្ធទាំងអស់ផងដែរ។
ថ្លែងក្នុងពិធីបើកកិច្ចប្រជុំផែនការបង្ការ និងទប់ស្កាត់បទល្មើស លួច ឆក់ លេាកឧត្តមសេនីយ៍ទេា ទិត្យ ណារ៉ុង ស្នងការនគរបាលខេត្តបានមានប្រសាសន៍លើកពីវិធានការបង្ការ ទប់ស្កាត់ និងបង្ក្រាបអំពើលួចឆក់ឲ្យកងកម្លាំងយកចិត្តទុកដាក់ត្រួតពិនិត្យនិងក្ដាប់សភាពការណ៍រាល់សកម្មភាពបទល្មើសគ្រប់ប្រភេទពិសេសបទល្មើស លួច ឆក់ ដែលកើតមានឡើងនៅតាមភូមិសាស្ត្រខេត្ត ដោយផ្តោតសំខាន់-រកឲ្យឃើញឧបាយកល និងកលល្បិចថ្មីៗ របស់មុខសញ្ញាលួច ឆក់ ។ ត្រូវសិក្សានិងកំណត់ភូមិសាស្ត្រស្មុគស្មាញដែលមុខសញ្ញា តែងតែប្រព្រឹត្តបទល្មើស ហើយមានឱកាសប្រមូលផ្តុំបក្សពួករៀបចំធ្វើសកម្មភាពថ្មី។ ពង្រឹងឡើងវិញនូវវិធានការគ្រប់គ្រងរដ្ឋបាលមធ្យោបាយត្រួតពិនិត្យ អាវុធជាតិផ្ទុះ ទីតាំងទទួលបញ្ចាំ ដើម្បីចូលរួមកិច្ចការបង្ការទប់ស្កាត់និងការងារស្រាវជ្រាវបទល្មើសក្នុងនោះត្រូវយកចិត្តទុកដាក់ការងារគ្រប់គ្រងការស្នាក់នៅបណ្តោះអាសន្នអ្នកប្រកបរបររកទទួលទានរត់ម៉ូតូឌុប ម៉ូតូកង់បី រថយន្តតាក់ស៊ី ។ល។ ដើម្បីមានវិធានការក្តាប់ហ្មត់ចត់មុខរបរដែលងាយមានការទាក់ទងនឹងអំពើចោរកម្ម ។
ត្រួតពិនិត្យសមាសភាពជនសង្ស័យជាប្រភេទក្រុមកេ្មងទំនើង ប្រើប្រាស់យានយន្តមិនប្រក្រតី (ម៉ូតូគ្មានស្លាកលេខ ឬស្លាកលេខក្លែងក្លាយ បិតស្លាកលេខ ឬ ដោះស្លាកលេខទុក) យានយន្តខុសលក្ខណៈបច្ចេកទេស។ ល។
ត្រូវកសាងប្រើប្រាស់ភ្នាក់ងារផ្តល់ព័ត៌មាន និងមហាជនល្អ ដើម្បីទទួលព័ត៌មានបម្រើការងារបង្ការបង្ក្រាបមុខសញ្ញាបានទាន់ពេលវេលា ។សហការជាមួយមូលដ្ឋានបំផុសចលនាមហាជនប្រជាការពារ ភូមិឃុំរួមចំណែកលើកកម្ពស់ការអនុវត្តនិងផ្សព្វផ្សាយគោលនយោបាយភូមិ-ឃុំមានសុវត្ថិភាព ត្រូវពិនិត្យសើរើសំណុំរឿងដែលបានស៊ើបអង្កេតបញ្ចប់បញ្ជូនទៅសាលាដំបូង ដើម្បីសហការពន្លឿនចេញដីកាស្វែងរកចាប់មុខសញ្ញាសេសសល់ក្នុងការបង្ក្រាបមិនទាន់អស់។ ជំរុញការអនុវត្តនូវវិធានការគ្រប់គ្រងមុខសញ្ញាព្រហ្មទណ្ឌគ្រប់ប្រភេទឲ្យបានច្បាស់លាស់ដើម្បីបម្រើឲ្យការងារស៊ើបអង្កេតបង្ក្រាបមានគុណភាពនិងប្រសិទ្ធិភាពខ្ពស់ ។
ឆ្លៀតក្នុងឱកាសនេះដែរ លោកឧត្តមសេនីយ៍ទេា ប៉ុន រតនា និង លោកឧត្តមសេនីយ៍ទោ នឹម ច័ន្ទដាណា ដែលជាអនុប្រធាននាយកដ្ឋានព្រហ្មទណ្ឌ បានមានប្រសាសន៍ក្រេីនរំលឹកដល់កម្លាំងទាំងអស់ត្រូវអនុវត្តផែនការបង្ការទប់ស្កាត់និងង្ក្រាបអំពើលួចឆក់ប្រជាពលរដ្ឋពិសេសភ្ញៀវទេសចរណ៍បរទេសសូមឲ្យកម្លាំងនគរបាលព្រហ្មទណ្ឌអង្គភាពនគរបាលទេសចរណ៍និងកម្លាំងនគរបាលចរាចរណ៍និងកម្លាំងដែលពាក់ព័ន្ធដ៏ទៃទៀតត្រូវរួមកិច្ចសហប្រតិបត្តិការណ៍គ្នាឲ្យបានកាន់តែល្អបន្ថែមទៀតដេីម្បីអនុវត្តភារកិច្ចឲ្យមានតម្លាភាព៕