រដ្ឋបាលខេត្តកំពង់ឆ្នាំង បើកកិច្ចប្រជុំពិធីបិទសវនកម្មផ្ទៃក្នុង សម្រាប់ការិយបរិច្ឆេទឆ្នាំ២០១៨ និងបណ្ដាឆ្នាំពាក់ព័ន្ធ
ខេត្តកំពង់ឆ្នាំង៖ នៅរសៀលថ្ងៃទី០៧ ខែមិថុនា ឆ្នាំ២០១៩ នៅសាលប្រជុំរដ្ឋបាលខេត្តកំពង់ឆ្នាំង បានបើកកិច្ចប្រជុំពិធីបិទសវនកម្មផ្ទៃក្នុងសម្រាប់ការិយបរិច្ឆេទឆ្នាំ២០១៨ និងបណ្ដាឆ្នាំពាក់ព័ន្ធដោយកិច្ចប្រជុំបិទសវនកម្មនេះ មានការអញ្ជើញជាអធិបតីពីសំណាក់ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង ឯកឧត្តម ជឺ សាន អគ្គនាយរងសវនកម្មផ្ទៃក្នុង នៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ និងមានការចូលរួមពីលោក លោកស្រីប្រតិភូអគ្គនាយកដ្ឋានសវកម្មផ្ទៃក្នុង លោកនាយក នាយករងរដ្ឋបាលសាលាខេត្ត នាយក នាយករងទីចាត់ ប្រធានអង្គភាព និងមន្ត្រីជំនាញពាក់ព័ន្ធ។
ជាលទ្ធផល ឯកឧត្តម ឈួរ ច័ន្ទឌឿន អភិបាលខេត្ត បានទទួលយកអនុសាសន៍ល្អៗ ដើម្បីកែលំអរដែលសវនករបានចុះសវកម្មលើឯកសារ និងការអនុវត្តការងារផ្សេងៗដែលបានវិភាគ និងរកឃើញថានៅមានចំណុចខ្វះខាត។
ព្រមជាមួយគ្នានោះដែរ នៅក្នុងរបាយការណ៍សវនកម្មផ្ទៃក្នុង ក៏បានលើកឡើងពីការរីកចម្រើនរបស់ខេត្តកំពង់ឆ្នាំង ដែលបច្ចុប្បន្ននេះ ខេត្តកំពង់ឆ្នាំង ក្រោមការដឹកនាំរបស់ឯកឧត្តមអភិបាលខេត្ត ឃើញថាមានការរីកចំរើនគួរឱ្យកត់សម្គាល់។
ទន្ទឹមនឹងមានការរីកចម្រើននោះ ឯកឧត្តមអគ្គនាយករង ក៏បានស្នើឱ្យរដ្ឋបាលខេត្តអនុវត្តឱ្យបានត្រឹមត្រូវតាមសេចក្ដីណែនាំ និងខ្លឹមសារគតិយុត្តផ្សេងៗទៀតដើម្បីលុបបំបាត់ភាពអសកម្មមួយចំនួនតូច និងធ្វើយ៉ាងណាឱ្យរដ្ឋបាលខេត្តអនុវត្តការងារប្រកបដោយប្រសិទ្ធភាព និងប្រសិទ្ធផល និងមានការអភិវឌ្ឍបន្តបន្ទាប់ទៀត ៕