កិច្ចប្រជុំស្ដីពីការបូកសរុបលទ្ធផលដកហូតឯកសាររដ្ឋបាលកម្ពុជាមិនប្រក្រតី និងការទទួលពាក្យសុំជាជនបរទេសអន្តោប្រវេសន្ត សម្រាប់ខែឧសភា ឆ្នាំ២០១៩ និងទិសដៅការងារមុនថ្ងៃបញ្ចប់ឱសានវាទ
រាជធានីភ្នំពេញ ៖ នៅទីស្តីការក្រសួងមហាផ្ទៃ ព្រឹកថ្ងៃអង្គារ ២កើត ខែជេស្ឋ ឆ្នាំកុរ ឯកស័ក ពុទ្ធសករាជ២៥៦៣ ត្រូវនឹងថ្ងៃទី០៤ ខែមិថុនា ឆ្នាំ២០១៩ អគ្គនាយកដ្ឋានអន្តោប្រវេសន៍ក្រសួងមហាផ្ទៃ បានរៀបចំកិច្ចប្រជុំស្ដីពីការបូកសរុបលទ្ធផលដកហូតឯកសាររដ្ឋបាលកម្ពុជាមិនប្រក្រតី និងការទទួលពាក្យសុំជាជនបរទេសអន្តោប្រវេសន្ត សម្រាប់ខែឧសភា ឆ្នាំ២០១៩ និងទិសដៅការងារមុនថ្ងៃបញ្ចប់ឱសានវាទ ក្រោមអធិបតីភាព ឯកឧត្តម នាយឧត្តមសេនីយ៍ សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងមានការអញ្ជើញចូលរួមអង្គភាពពាក់ព័ន្ធជាតិ និងអន្តរជាតិជាច្រើន ។
តាមរបាយការណ៍លទ្ធផលបូកសរុបពីដំបូងដល់ថ្ងៃទី ៣១ ខែឧសភា ឆ្នាំ ២០១៩
១. ការងារដកហូតឯកសាររដ្ឋបាលកម្ពុជាមិនប្រក្រតី
-បានដកហូតឯកសាររដ្ឋបាលកម្ពុជាមិនប្រក្រតីចំនួន ៣៦,០៩៤ ឯកសារ ពីគ្រួសារជនបរទេសអន្តោប្រវេសន្តសរុបចំនួន ១៩,៣៩៥ គ្រួសារ គិតជាមនុស្សរួមចំនួន ៦៨,៨០១នាក់ ស្រី ៣៣,០៣៦ នាក់។
២. ការទទួលពាក្យសុំប្រកាសទទួលស្គាល់ជាជនបរទេសអន្តោប្រវេសន្ត
-បានផ្ដល់ប្រកាសទទួលស្គាល់ជាជនបរទេសអន្តោប្រវេសន្តអោយប្រេីប្រាស់ គិតជាមនុស្សរួមចំនួន ៥២,៧១០នាក់ ស្រី ២៥,៣១៦នាក់ ក្នុង ១៧,០៧៥គ្រួសារ។
៣. ការទទួលពាក្យសុំប័ណ្ណស្នាក់នៅអចិន្ត្រៃយ៍
-បានផ្ដល់ប័ណ្ណស្នាក់នៅអចិន្ត្រៃយ៍អោយជនបរទេសអន្តោប្រវេសន្តប្រេីប្រាស់ ២១,៨១២នាក់ ស្រី ១០,៣១៥នាក់ មានសុពលភាព ០២ឆ្នាំ។
ចំពោះទិសដៅ ៖
-បន្តការងារដកហូតឯកសារ ជម្រុញការដាក់ពាក្យសុំទទួលស្គាល់ជាជនបរទេសអន្តោប្រវេសន្ត និងប័ណ្ណស្នាក់នៅអចិន្ត្រៃយ៍ ដែលនៅសេសសល់ឲ្យបានអស់ចប់សព្វគ្រប់តាមភូមិសាស្ត្រនីមួយៗ។
-បន្តធ្វើរបាយការណ៍បូកសរុបនៅថ្នាក់រាជធានីខេត្ត ពេលចប់ឱសានវាទ ថ្ងៃទី៣០ ខែមិថុនា ឆ្នាំ ២០១៩។
-ត្រៀមការងារបូកសរុបដើម្បីបូកសរុបបិទបញ្ចប់យុទ្ធនាការ និងធ្វើបញ្ជីទទឹងគ្រួសារជនបរទេសដែលបានចេញប្រកាសទទួលស្គាល់ និងប័ណ្ណស្នាក់នៅអចិន្ត្រៃយ៍នៅទូទាំងប្រទេស ដើម្បីដាក់ជូនក្រសួងប្រថាប់ត្រាជាផ្លូវការ។
-ធ្វើរបាយការណ៍បូកសរុបលទ្ធផលការងារដោះស្រាយបញ្ហាជនបរទេស បែបអន្តោប្រវេសន៍ជូនរាជរដ្ឋាភិបាល។