ក្រុងសិរីសោភ័ណ រៀបចំកិច្ចប្រជុំសាមញ្ញ អាណត្តិទី២ លើកទី៦០ ជាលើកចុងក្រោយរបស់ខ្លួន
ខេត្តបន្ទាយមានជ័យ ៖ ថ្ងៃទី៣០ ខែឧសភា ឆ្នាំ២០១៩ម្សិលមិញ ក្រុមប្រឹក្សាក្រុងសិរីសោភ័ណ បានរៀបចំកិច្ចប្រជុំសាមញ្ញ អាណត្តិទី២ លើកទី៦០ ជាលើកចុងក្រោយ ដែលប្រព្រឹត្តទៅនៅសាលប្រជុំសាលាក្រុងសិរីសោភ័ណ ក្រោមវត្តមានលោក ជាម សុខ ប្រធានក្រុមប្រឹក្សាក្រុង លោក ហ៊ឹល រ៉ាយ៉ា អភិបាលនៃគណៈអភិបាលក្រុងសិរីសោភ័ណ សមាជិក-សមាជិកាក្រុមប្រឹក្សាក្រុង លោក លោកស្រី អភិបាលរងក្រុង និងអ្នកពាក់ព័ន្ធបានចូលរួម ។
កិច្ចប្រជុំផ្តោតលើរបៀបវរៈចំនួន៣ ៖ ១-ពិនិត្យពិភាក្សា និងអនុម័តលើសេចក្តីព្រាង កំណត់ហេតុប្រជុំសាមញ្ញលើកទី៥៩ របស់ក្រុមប្រឹក្សាអាណត្តិទី២ ។ ២-ពិនិត្យពិភាក្សា និងអនុម័តលើរបាយការណ៍ប្រចាំខែឧសភា ឆ្នាំ២០១៩ ស្តីពីការអនុវត្តការងាររបស់រដ្ឋបាលក្រុងសិរីសោភ័ណ ។ ៣-ពិនិត្យពិភាក្សា និងអនុម័តលើតារាងបែងចែកប្រាក់រង្វាន់ប្រចាំខែឧសភា ឆ្នាំ២០១៩ ។ រួមនឹងការលើកឡើងសំនួរ ចម្លើយ និងការបញ្ចេញមតិយោបល់ និងបានលើកឡើងពីបញ្ហាប្រឈមផ្សេងៗ ។
លោក ជាម សុខ និងលោក ហ៊ឹល រ៉ាយ៉ា បានថ្លែងការកោតសរសើរ ចំពោះសមាជិក-សមាជិកាក្រុង អាណត្តិទី២ ដែលបានចូលរួមបម្រើការងារ ផ្សេងៗជូនប្រជាពលរដ្ឋនាពេលកន្លងមកបានយ៉ាងល្អប្រសើរ និងមានការកោតសរសើរពីមជ្ឈដ្ឋានខាងក្រៅ លើការដោះស្រាយបញ្ហាផ្សេងៗជូនប្រជាពលរដ្ឋបានទាន់ពេលវេលា ដែលទាំងនេះគឺជាអ្វីដែលយើងទទួលបាន និងមានការឆ្លើយពីតបកោតសរសើរពីពលរដ្ឋដែលទទួលបានសេវា ។ បើទោះបីសមាជិក-សមាជិកា អាណត្តិទី២ ត្រូវដល់អាណត្តិក៏ដោយ ក៏យើងនៅតែរួមគ្នា ដោះស្រាយរាល់បញ្ហាដែលមាននៅមូលដ្ឋាន យើងត្រូវជួយណែនាំបន្ថែម ដល់សមាជិក-សមាជិកា អាណត្តិថ្មី នូវបទពិសោធន៍កន្លងមក ។ លោក ហ៊ឹល រ៉ាយ៉ា បានប្រសិទ្ធពរជ័យជូនចំពោះសមាជិក-សមាជិកា ដែលត្រូវបញ្ចប់អាណត្តិ ទទួលបានសុខភាពបរិបូណ៌ កម្លាំងកាយមាំមួន និងបន្តជួយដល់ពលរដ្ឋនៅតាមមូលដ្ឋានបន្តទៀត ។ ជាមួយគ្នានោះ លោក ហ៊ឹល រ៉ាយ៉ា អភិបាលនៃគណៈអភិបាលក្រុងសិរីសោភ័ណ បានជម្រុញដល់អ្នកពាក់ព័ន្ធ ត្រូវចូលរួមផ្សព្វផ្សាយឲ្យបានផុសផុលទាក់ទិននឹងជម្ងឺគ្រុនឈាមដែលកំពុងតែកើតមាន ដោយរដូវនេះជារដូវវស្សាមានការធ្លាក់ភ្លៀងច្រើន ហើយក៏សំបូរទៅដោយជម្រកមូសខ្លា ដែលវាបង្កឲ្យកើតមាននូវជម្ងឺគ្រុនឈាម មិនថាតែកុមារ ឬមនុស្សធំឡើយ គឺអាចកើតមានគ្រប់ពេលបើយើងមានការធ្វេសប្រហែស ពិសេសត្រូវដេកនៅក្នុងមុងឲ្យបានជាប្រចាំ ៕
