សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជេីញជាអធិបតីក្នុងពិធីរំលឹកខួបអនុស្សាវរីយ៍លេីកទី ៧៤ ថ្ងៃកំណេីតនគរបាលជាតិកម្ពុជា ១៦ ឧសភា ១៩៤៥ - ១៦ ឧសភា ២០១៩
រាជធានីភ្នំពេញ ៖ ព្រឹកថ្ងៃព្រហស្បតិ៍ ១៣កេីត ខែពិសាខ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី១៦ខែឧសភា ឆ្នាំ២០១៩ នៅទីស្ដីការក្រសួងមហាផ្ទៃ បានរៀបចំ អបអរសាទរពិធីរំលឹកខួបអនុស្សាវរីយ៍លេីកទី ៧៤ ថ្ងៃកំណេីតនគរបាលជាតិកម្ពុជា ១៦ ឧសភា ១៩៤៥ - ១៦ ឧសភា ២០១៩ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងអញ្ជេីញចូលរួម ឯកឧត្ដម រដ្ឋលេខាធិការ-អនុរដ្ឋលេខាធិការ ឯកឧត្ដម អគ្គស្នងការ-អគ្គស្នងការរងនគរបាលជាតិ ឯកឧត្ដម អគ្គនាយក-អគ្គនាយករង ឯកឧត្ដម ប្រធាន-អនុប្រធាននាយកដ្ឋាន លោកស្នងការខេត្ត បណ្ដាអង្គភាពពាក់ពន្ធ័ ចំណុះក្រសួងមហាផ្ទៃ នាយនគរបាលជាតិចូលនិវត្តន៍ និងភ្ញៀវកិត្តិយសសរុប ៧៦៨រូប។
ជាកិច្ចចាប់ផ្តើម ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានឡើងថ្លែងសន្ទរកថាស្វាគមន៍ និងអានរបាយការណ៍បូកសរុបស្នាដៃ និងសមិទិ្ធផលរបស់កងកម្លាំងនគរបាលជាតិកម្ពុជាឆ្នាំ ២០១៨ ដោយក្នុងនោះរួមមានការងាររក្សាការពារសន្តិសុខជាតិ, ការងារបង្ការទប់ស្កាត់ និងបង្ក្រាបបទល្មើស, ការងាររក្សាសណ្តាប់ធ្នាប់សាធារណៈ, ការងារគ្រប់គ្រងប្រជាពលរដ្ឋ និងជនបរទេស ,ការងារថែរក្សាការពារសន្តិសុខព្រំដែន, កំណែទម្រង់នគរបាលជាតិ និងការកសាងកម្លាំង, ការងារផុសភានិងហិរញ្ញវត្ថុ។
ស្ថិតក្នុងទិវាដ៏ប្រសេីរថ្លៃថ្លានេះដែរ សម្តេចក្រឡាហោម បានថ្លែងអំណរគុណយ៉ាងជ្រាលជ្រៅ និងកោតសរសើរដោយស្មោះចំពោះកងកម្លាំងនគរបាលជាតិគ្រប់ជំនាន់ ដែលបានធ្វើពលីកម្មគ្រប់បែបយ៉ាងក្នុងការបំពេញកាតព្វកិច្ចប្រកបដោយស្មារតីអង់អាចក្លាហាន និងមានការទទួលខុសត្រូវខ្ពស់ ដើម្បីការពារឯករាជ្យ អធិបតេយ្យភាពជាតិ បូរណភាពទឹកដី រក្សាបាននូវសុខសន្តិភាព ស្ថេរភាពនយោបាយ
បញ្ជៀសបាននូវអំពើភេរវកម្ម បង្ការទប់ស្កាត់ និងបង្ក្រាបទាន់ពេលវេលានូវឧក្រិដ្ឋកម្មឆ្លងដែន ប្រឆាំងទប់ស្កាត់ឧបាយកល សកម្មភាពរបស់ពួកបច្ចាមិត្តគ្រប់ប្រភេទ ដែលបានបំផុសចលនាបង្កើតក្រុមប្រដាប់អាវុធខុសច្បាប់ និងធ្វើបដិវត្តន៍ពណ៌ប៉ុនប៉ងផ្ដួលរំលំរាជរដ្ឋាភិបាលស្របច្បាប់។ កងកម្លាំងនគរបាលជាតិបានតស៊ូជំនះគ្រប់ឧបសគ្គ និងការលំបាកគ្រប់បែបយ៉ាងដោយបានលះបង់ពេលវេលា កម្លាំងកាយចិត្ត រួមទាំងអាយុជីវិតដើម្បីប្រយុទ្ធប្រឆាំងបទល្មើសព្រហ្មទណ្ឌគ្រប់ប្រភេទ សំដៅការពារអាយុជីវិត ទ្រព្យសម្បត្តិប្រជាពលរដ្ឋ និងទ្រព្យសម្បត្តិសាធារណៈ បង្កើតបាននូវបរិយាកាសប្រកបដោយភាពកក់ក្ដៅក្នុងសង្គមទាំងមូល។
ជាមួយគ្នានោះដែរ សម្ដេចក្រឡាហោម ក៏បានសម្ដែងនូវសេចក្ដីសោកស្ដាយ និងសូមចូលរួមរំលែកទុក្ខជាមួយក្រុមគ្រួសារ ញាតិមិត្ត កូនចៅ ឪពុកម្ដាយ របស់មន្ត្រីនគរបាលជាតិ ដែលបានពលីជីវិតក្នុងបុព្វហេតុបម្រើឧត្តមប្រយោជន៍ជាតិ ក្នុងរយៈពេលកន្លងមក និងសូមបួងសួងឲ្យវិញ្ញាណក្ខន្ធរបស់បងប្អូនបានទៅកាន់សុគតិភពកុំបីឃ្លៀងឃ្លាតឡើយ ។ សម្ដេចក៍បានថ្លែងអំណរគុណយ៉ាងជ្រាលជ្រៅចំពោះសកម្មភាព និងស្នាដៃរួមចំណែកយ៉ាងធំធេងក្នុងបុព្វហេតុជាតិមាតុភូមិ និងប្រជាជន របស់មិត្តនគរបាលចូលនិវត្តន៍ទាំងអស់ និងសូមសន្យាគោរព និងចងចាំជានិច្ចនូវគុណបំណាច់របស់វីរៈយុទ្ធមិត្តក្នុងដួងចិត្តជារៀងរហូត។