លោកជំទាវ កុប ម៉ារីយ៉ាស់ អ្នកតំណាងរាស្រ្តមណ្ឌលកំពង់ឆ្នាំង អញ្ជើញចុះសួរសុខទុក្ខ និងចែកអំណោយរបស់សប្បុរសជនពីម៉ាឡេស៊ី ដល់បងប្អូនប្រជាពលរដ្ឋចំនួន ៩៣គ្រួសារ រស់នៅឃុំឆ្នុកទ្រូ ស្រុកបរិបូណ៌
ខេត្តកំពង់ឆ្នាំង៖ នាព្រឹកថ្ងៃអង្គារ ៥កើត ខែចេត្រ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៩ ខែមេសា ឆ្នាំ២០១៩ លោកជំទាវ កុប ម៉ារីយ៉ាស់ អ្នកតំណាងរាស្រ្តមណ្ឌលកំពង់ឆ្នាំង ឯកឧត្តម សាន់ យូ សមាជិកក្រុមប្រឹក្សាខេត្តកំពង់ឆ្នាំង និងជាប្រធានក្រុមការងារសមាគមសម្ព័ន្ធយុវជនមុស្លិមខេត្តកំពង់ឆ្នាំង ព្រមទាំងក្រុមការងារសមាគមសម្ព័ន្ធយុវជនមុស្លិមខេត្តកំពង់ឆ្នាំង បានចុះសួរសុខទុក្ខ និងចែកអំណោយរបស់សប្បុរសជនពីម៉ាឡេស៊ី តាមរយៈសមាគមសប្បុរសធម៌ និងក្ដីសង្ឃឹមនៃកុមារ និងចាស់ជរា ជូនដល់បងប្អូនប្រជាពលរដ្ឋចំនួន ៩៣គ្រួសារ ដែលរស់នៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ដែលបានបម្លាស់ទីពីលើទឹក មករស់នៅលើគោក។
ឆ្លៀតក្នុងឱកាសនោះ លោកជំទាវបានសំណូមពរសូមឱ្យបងប្អូនកូនក្មួយត្រូវប្រុងប្រយ័ត្នចំពោះបញ្ហានានាក្នុងរដូវប្រាំងនេះ ដោយសាររដូវនេះជារដូវក្តៅខ្លាំង ជាពិសេសក្មេងៗ ចាស់ជរា ស្រ្តីមានផ្ទៃពោះ បើមានបញ្ហាផ្សេងៗគឺសូមរាយការណ៍ជូនអាជ្ញាធរមូលដ្ឋានភ្លាមៗ និងត្រូវប្រកាន់ខ្ជាប់នៅការហូបស្អាត ផឹកស្អាត និងរស់នៅស្អាតផងដែរ បន្ទាប់មកលោកជំទាវ ក៏បានចែកអំណោយមនុស្សធម៌ជូនដល់គ្រួសារនីមួយៗក្នុងពេលនោះផងដែរ ៕
